PD protestë në 4 qytete të vendit, demokratët: Të gjithë bashkë më 16 shkurt, ta largojmë këtë qeveri mafioze nga pushteti

Banorët demokratë të Shkodrës u mblodhën këtë të shtunë në sheshin "Nënë Tereza" për të protestuar ndaj situatës aktuale në vend, konkretisht ndaj varfërisë, papunësisë e taksave të larta.Midis tyre, krahas drejtuesve lokalë, është hasur edhe prania e përfaqësuesve të zonave të prekur nga përmbytjet dhe të atyre të sindikatave.

Banorët demokratë, teksa mbanin pankarta në duar, brohoritën njëzëri për rrëzimin e qeverisë Rama. "Është për të ardhur keq që bijmë dakord me qeveritarë për hatër të një vendi, për të lëpirë kockë. Prandaj u bëj thirrje titullarëve, qofshin ata deputetë apo titullarë që të ngrijnë zërin për këtë popull. Të mos jenë thjesht kukulla",  u shpreh një protestues. "Fundi i kësaj qeverisë do t'i vijë nga Shkodra, sic i ka ardhur historikisht", u shpreh një tjetër. "Qeveria e Ramës e ka harruar plotësisht Shkodrën", u shpreh një i tretë. 

Banorët demokratë të rretheve të Tepelenës, Përmetit dhe Gjirokastrës u mblodhën këtë të shtunë në hyrje të kësaj të fundit për të protestuar për gjendjen aktuale të qarkut. Krahas këtyre banorëve, u has prezenca e deputetit demokrat Tritan Shehu si edhe drejtuesve lokalë, sikurse të ish-kryetarit të komunës së Lazaratit Dashamir Aliko.

Tritan Shehu u shpreh për Report Tv se protesta pritej të ndodhte dhe se ky reagim popullor sipas tij duhet të vazhdojë edhe më tej ndaj "qeverisë së korruptuar", në mënyrë që kjo e fundit të largohet.

Është një protestë në vazhdim, pikërisht për të protestuar për problemet e mëdha që kanë qytetarët. Ishin vet qytetarët që u mblodhën për varfërinë, arrogancën, papunësinë, mosrespektimin e të drejtave të njeriut, drejtave të pronës, për problemet e mëdha që ka universiteti e shërbimi shëndetësor në qarkun e Gjirokastrës. Kur flas për Gjirokastrën e kam fjalën për të gjithë qarkun, që nga Përmeti deri në Libohovë, Dropull, Memaliaj, që nga Tepelena.

Pra për të gjithë këtë zonë që është me vlera të mëdha historike, me vlera të mëdha të zhvillimit ekonomik të vendit e që fatkeqësisht sot është në degradim. Pjesëmarrja ishte normale, e gjerë, ishte një pjesëmarrje që shprehte reaksionin e njerëzve ndaj problemeve të vendit. Mendoj që është koha dhe momenti për të zhvilluar këtë element të protestës, këtë revoltë popullore në këtë zinxhir politik që ka shpërthyer në të gjithë Shqipërinë e që pa dyshim do të detyrojë këtë qeverisje të papërgjshme, që punon kundër interesave të vendit, që të largohet.

Tritan Shehu, Deputet i Partisë Demokratike

Qytetarët demokratë të rretheve të Korçës u mblodhën në qendër të qytetit për të protestuar për gjendjen aktuale të vendit. Në krah të tyre ishin edhe eksponentë të Partisë Demokratike, sikurse deputeti Ervin Salianji. Në kuadër të protestës së madhe opozitare që është paralajmëruar të mbahet më datë 16 shkurt, demokratët tubuan drejt Bashkisë me pankarta në duar. "Po na helmoni me TEC-in", "Nuk e duam TEC-in", "Qeveria të mbajë premtimet",  lexohej në disa prej tyre. Disa prej qytetarëve gjuajtën edhe me vezë drejt Bashkisë, një mënyrë e zgjedhur kjo për të shfaqur revoltën ndaj qeverisë "Rama".

Shenjat e vezëve në murin e Bashkisë

Deputeti demokrat Ervin Salianji në protestën e zhvilluar në Korcë 

Nën drejtimin e deputetit demokrat Xhemal Gjunkshi, qindra banorë u mblodhën në bulevardin e qytetit Peshkopi për të protestuar për çmimet dhe taksat e larta, mungesën e infrastrukturës rrugore, si dhe atë të ujit të pijshëm. Gjunkshi u shpreh nga protesta se kjo qeveri duhet rrëzuar sa më parë, pasi sipas tij e mbështet pushtetin e saj mbi mashtrimet, drogën dhe korrupsionin. Deputeti demokrat u bëri thirrje banorëve që më datë 16 shkurt të marrin pjesë në protestën që do të organizojë opozita në Tiranë. "Ta largojmë këtë qeveri mafioze nga pushteti", u shpreh ai.