Dënimi i Salianjit, PD kaos në Kuvend! Noka hedh benzinën, Nallbati u vë zjarrin karrigeve në oborr, sende të forta drejt Spiropalit: Duam qeveri teknike! Përjashtohet Noka

Pasi deputetët e opozitës dogjën karriget dhe bllokuan foltoren ditën e sotme në senacën plenare, një reagim ka ardhur edhe nga Ministri i Shtetit për Marrëdhënien me Parlamentin Tualant Balla.

Përmes një postimi në rrjetet sociale, ai shkruan se dhuna në Kuvend porositet nga Sali Berisha. Sipas tij, dhuna e opozitës është në favor të mazhorancës, e cila vetëm ecën përpara.

 “Sa herë Shqipëria gjendet para një momenti historik, siç presim me padurim Konferencën e Dytë Ndërqeveritare pas pak ditësh në Bruksel, mes Shqipërisë dhe BE, përsëri Sali Berisha ka porositur dhunë.

‘Marrëzia është bësh të njëjtin veprim vazhdimisht e të presësh rezultate të ndryshme’ thoshte Ajnshtajni. Edhe me dhunën e Saliut, rezultati ka qenë gjithmonë i njëjtë. Sa më të dhunshëm bëhen, aq më të vendosur jemi ne për të ecur përpara në rrugën tonë, pasi sot kjo është e vetmja rrugë që afron Shqipërinë me Europën.

Sa më shumë dhunë prej tyre, aq më shumë vota në zgjedhjet e ardhshme për ne, sepse askush nuk voton për partinë e dhunës dhe destabilitetit, as në Shqipëri e as në diasporë", shkruan ai.

Kryesia e Partisë së Lirisë, përmes një deklarate dënoi atë që e cilëson dënim politik dhe burgosje të deputetit të Partisë Demokratike, Ervin Salianji.

Kryesia e PL shprehet se mbështet plotësisht qëndrimin e opozitës në Parlament, ku deputetët e opozitës ditën e sotme bllokuan foltoren dhe dogjën karriget e tyre në oborrin e Kuvendit. 

"Ky vendim i urdhëruar nga Edi Rama dhe i zbatuar nga gjykatësit e Ramaformës tregoi fytyrën e vërtetë të Narkoshtetit dhe të Narkodrejtësisë, të angazhuar në funksion të agjendës politike dhe elektorale të Kryeministrit për asgjësimin e opozitës, pluralizimit politik dhe demokracisë. Kryesia e PL mbështet plotësisht qëndrimin e drejtë të opozitës në Parlament dhe protestën kombëtare të thirrur në datën 7 tetor", thuhet në deklaratë. 

Ka zgjatur vetëm 15 minuta e 02 sekonda seanca e sotme plenare, pasi deputetët demokratë kanë kthyer sallën “përmbys”, pas njoftimit të heqjes se imunitetit si deputet, Ervin Salianji.

Teksa kryeparlamentarja lexonte procedurën për heqjen e imunitetit të Salianjit dhe vendin vakant, deputetët nisën me hedhjen e sendeve ndaj saj, ku pasi thyen një karrige, e kanë gjuajtur me copa të drurit.

Të bërë “gardh” para foltores, deputetët e PD penguan punimet e kësaj seance, ndërsa më pas u zhvendosën dhe morën karriget nga salla duke i nxjerrë tek dera hyrëse e Kuvendit. Akti pasardhës ishte vendosja e zjarrit të karrigeve, ku u desh ndërhyrja e gardës me bobola zjarrfikëse për të shuar flakët që u përhapën me shpejtësi.

Siç duket edhe në fotot, deputetët e PD kanë qëndruar pranë zjarrit, ku Ina Zhupa me syze dielli e duart kryq, së bashku dhe me kolegë të tjerë, vështronin “pamjen”.

Deputeti i PS, Petro Koçi ka reaguar pas seancës së sotme plenare në Kuvend, ku opozita i vuri flakën karrigeve, bllokojë foltoren dhe hodhi sende të forta në drejtim të kryetares së Kuvendit.

Përmes një postimi në rrjetet sociale, Koçi shprehet se këto veprime synojnë që ti bëhet presion drejtësisë për të liruar Berishën dhe jo për të të mbrojtur Salianjin.

“Sot serish PD dëshmoi se nga dikur regjim gangsterësh ka mbetur parti gangsterësh. Reagimi i tyre vërteton se rasti Babale nuk është produkt vetëm i aventurizmit dhe mendjelehtësisë, por një intrige ku janë përfshirë nivele me përgjegjësi të larta politike në PD. Kjo bashkëfajësi shkakton veprime të papërgjegjshme. Ndërkohë veprimet e stilit guerril nuk kanë për qëllim mbrojtjen e Salianjit, por presionin ndaj drejtësisë që të tërhiqet nga gjykimi objektiv ndaj Sali Berishës, i cili po përpiqet të bëjë biznes me burgun e deputetit të vet”, shkruan ai.

Pas kaosit të shkaktuar nga opozita ditën e sotme në seancën plenare në Kuvend, ka ardhur një reagim nga Kryetari i Grupit Parlamentar i PS, Niko Peleshi.

Përmes një postimi në rrjetet sociale, ai shprehet se dhuna është e papranueshme.

Sipas tij, deputetët nuk janë aty për t’u përleshur, por për të debatuar me fjalë.

“Aktet e sotme të dhunës në Parlamentin e Shqipërisë nuk përfaqësojnë thjesht një aksion politik nga opozita, por janë një manifestim i qartë i dhunës së papranueshme, që tejkalon çdo veprim radikal të mëparshëm. Djegia e karrigeve është simbol i djegies së besimit të qytetarëve, pikërisht në ditët kur Shqipëria ka nevojë më shumë se kurrë për bashkimin e forcave në rrugën e hapur drejt Bashkimit Europian.

Sot nga ne pritet përgjegjshmëri, maturi politike dhe përkushtim ndaj reformave që përqafojnë vlerat europiane. Seanca parlamentare duhet të jetë tempull i etikës dhe respektimit të ligjit, dhe jo një skenë ku ligji shkelet dhunshëm. Deputetët tanë nuk janë aty për t’u përleshur me këmbë karrigesh, por për të debatuar me fjalë. Deputetit nuk mund t’i tolerohet asgjë që i ndalohet qytetarit të zakonshëm. Aq më tepër dhuna”, shkruan ai.

Me tensione dhe përplasje është zhvilluar seanca e sotme në Kuvend.

Përplasje ka pasur edhe mes deputetit të Partisë Socialiste Erion Braçe dhe kreut të Grupit Parlamentar të Partisë Demokratike Gazment Bardhi.

Teksa Braçe ishte duke folur, Bardhi është afruar dhe i ka fikur mikrofonin duke mos e lejuar që të vijoj fjalën.

Seanca e sotme në Kuvend është shoqëruar me tensione dhe përplasje të forta mes deputetëve.

Kryeparlamentarja Elisa Spiropali përjashtoi nga seanca deputetin e PD Flamur Noka, pasi ky i fundit u përplas verbalisht me deputetin Petro Koço, duke i shkulur mikrofonin teksa ky i fundit ishte duke folur, madje në një moment e qëllon në dorë.

Deputetët e PD menjëherë pas njoftimit të heqjes së mandatit të deputetit Ervin Salianjit, kanë bllokuar foltoren dhe kanë gjuajtur me sende të ndryshme drejt kryeparlamentares Elisa Spiropali.

Skenë krimi e quan kryeparlamentarja Elisa Spiropali kaosin dhe skenat e dhunës që opozita riktheu në sallën e Kuvendit, pas dënimit të Ervin Salianjit me 1 vit burg për kallëzim të rremë në dosjen Babale.

Pas djegies së karrigeve dhe skenat e dhunës në Kuvend, ku ndaj saj u hodhën edhe sende të forta, Spiropali kërkon që salla e Kuvendit të merret në këqyrje nga organet ligjzbatuese.

“Karriget tona janë të qytetarëve” tha një deputet i opozitës! Kjo është shumë e vërtetë dhe prandaj ato karrige janë për t’u respektuar duke u ulur mbi to me peshën e besimit të marrë prej qytetarëve. Djegia e tyre dëshmon nivelin më ekstrem të mungesës së respektit për qytetarët, ligjin dhe institucionet e shtetit demokratik", shkruan Spiropali. 

Djegia e karrigeve të Kuvendit, sipas Spiropalit tregon mungesën e respektit ndaj qytetarëve, ndërsa thekson se zjarrin mbi parlament e vënë vetëm shkatërruesit e demokracisë.

"Fatkeqësisht zjarrin mbi parlamentet e kanë vënë vetëm përbuzësit dhe shkatërruesit më të mëdhenj të demokracisë në historinë e saj. Edhe më fatkeqësisht zjarrvënia e sotme, dhe aktet ekstreme të dhunës brenda sallës, e kanë kthyer Kuvendin në një skenë krimi, për t'u marrë në këqyrje nga organet ligjzbatuese. Keqardhje e thellë”, shkruan Spiropali.

Pas djegies së karrigeve jashtë Kuvendit, deputetët e opozitës, në një prononcim për media, kanë paralajmëruar se kaosi do të vijojë edhe në seancat që do të vijnë.

Ata e kanë cilësuar arrestimin e Berishës dhe Salianjit si arrestime politike.

Deklaratat e deputetëve të PD:

Dhurata Çupi: Edi Rama ka djegur Shqipërinë, Kushtetutën, ka shitur Shqipërinë dhe s’ka asnjë lloj normaliteti me atë. Këtë pamje që patë sot do ta shihni çdo të hënë dhe çdo të enjteje.

Ina Zhupa: Rama ka djegur Kushtetutën. Janë futur në burg Berisha, Beleri dhe Salianji, janë të burgosur politik. Është çuar në burg një deputet me vullnetin politik të Ramës , jemi të vendosur që të mbrojmë Kushtetutën, kur këto padrejtësi i bëhen deputetëve dhe liderit të opozitës, shqiptarët sot janë të pambrojtur. Flaka do ti dal këtij sistemi nëse nuk respektohet rendi kushtetues.

Luan Baçi: Çuarja në burg e Salianjit, atë nuk kanë për ta izoluar do ta vazhdojë fushatën nga aty bashkë me ne. Që me arrestimin e Berishës qysh atë ditë ne duhet që ta ndiznim zjarr dhe jo vetëm karriget e këtij parlameti dhe mbushet gota duke arrestuar Salianjin, sepse foli për një trafikant droge, ai është një denoncim i vërtetë.

Asllan Dogjani: Rama tregoi se ka kapur sistemin e drejtësisë, ka në dorë grupet kriminale. Qytetarët duhet të marrin në dorë fatin e tyre dhe të rrëzojmë Ramën që vjedh e të gjitha mënyrat. Nga sot nuk do të ketë më normalitet në seanca plenare, na ka shpallur luftë sepse mban nën arrest Berishën, Salianji është pas hekurave.

Flamur Noka dhe Bledion Nallbati iu vënë flakën karrigeve të deputetëve të opozitës në oborrin e Kuvendit. Noka nxori benzinën nga çanta e deputetes Elda Hoti dhe më pas Bledion Nallbati i vuri flakën karrigeve.

Flamur Noka foli për mediat pas mbylljes së seancës kaotike sot në Kuvend, ku deputetët e opozitës i vunë flakën karrigeve të parlamentit në oborrin përpara hyrjes në parlament. Noka tha se këtë panoramë që u pa sot do jetë në çdo seancë.

'Edi Rama duke sulmuar opozitën prej 3 vjetësh i ka vënë flakën Shqipërisë. Për interesat e xhepit të tij dhe oborrtarëve të tij. Ndaj ne jemi këtu për të kryer misionin e dhënë nga demokratët. Kemi 3 vjet që Rama na ka hapur luftë. Tentoi të na likuidojë dështoi, burgosi kryetarin e opozitës ka burgosur nënkryetarin e PBDNJ dhe tani burgosi Salianjin. Zgjidhje shikon dënimin me burg.

Kushdo që i nxjerr të palarat me drogën dhe lidhjet me krimin. Ne nuk ndalojmë, ta harrojë Rama që mund të bllokojë opozitën. Opozita është në ballë të aksionit. Ditën e hënë ora 6, pa ndalim kundër regjimit. Shqiptarët meritojnë një qeverisje të denjë. Do ti dalim zot këtij vendi. Të enjten dhe çdo parlamenti do jetë kjo panoramë. Nuk ka kompromis me mafien. Jemi në betejë. Qeveria teknike është zgjidhje. Me narko qeveri Shqipëria nuk ka paqe.'

Seanca plenare është mbyllur pas skenarit të kaosit nga opozita.

Ndërkohë, kryetarja e Kuvendit njoftoi përjashtimin e Flamur Nokës, i cili hodhi sende të forta në drejtim të kryeparlamentares.

Deputeti i PS, Erion Braçe ka reaguar pas skenarëve të dhunës së deputetëve të PD, të cilët hodhën edhe sende të forta drejt kryetares së Kuvendit. Braçe ka kërkuar të merren masa, duke thënë se iu rrezikua jeta Spiropalit. “Është marrë jeta në mes të bulevardit ashtu siç jeta e njerëzve që mendojnë ndryshe nuk llogaritet fare”, tha Braçe.

“Goditja e kryetares në atë farë mënyre rrezikon jetë. Është marrë jeta në mes të bulevardit ashtu siç jeta e njerëzve që mendojnë ndryshe nuk llogaritet fare. Të qëllosh me sende të atij lloji rrezikon jetën e njerëzve.

Vënia në rrezik i  jetës së njerëzve brenda sallës së kuvendit është mesazhi më i poshtër. Dhuna është e paparanushme dhe duhet të marrë dënimin e merituar. Ç’kuptim ka të ndëshkohen ata jashtë salle dhe të dhuna të donimojë në këtë sallë”, tha Braçe.

PD ka rikthyer sërish ditën e sotme kaosin në Kuvend, ndërsa kanë nxjerrë jashtë sallës së parlamentit karriget e deputetëve të opozitës dhe i kanë vënë flakën.

Në një prononcim për media, kreu i Grupit Parlamentar të PD-së Gazment Bardhi deklaroi se e gjitha kjo bëhet për shkak të arrestimi të Berishës dhe Salianjit.

“Berisha ka në arrest shtëpie prej një viti sepse ka vendosur të përballet me regjimin e Ramës i dyti ishte që denoncoi lidhjet e familjes Xhafaj dhe po e vuan sot prej tre ditësh, është në burgun e Fierit dhe karriget tona janë të qytetarëve, Rama ka djegur parlamentin, ndërsa ne dorëzojmë karriget tona dhe i djegim. Djegien e mandateve e bëri kush e bëri dhe ishte shmangie nga beteja ne nuk shmangemi nga beteja do na kenë përballë në çdo moment që tentojnë që ti mbyllin gojës opozitës”, tha ai.

PD ka rikthyer kaosin në Kuvend. Ata kanë nxjerrë jashtë sallës së parlamentit karriget e deputetëve të opozitës dhe i kanë vënë flakën.

Deputetët e PD-së në nisjen e seancës së sotme janë përplasur me gardën e republikës pranë foltores teksa hodhën sende dhe shishe në drejtim të ministrave dhe kryetares së parlamentit, Spiropali.

Më tej ata morën karriget e kuvendit ku ata ulen dhe i nxorën jashtë në oborrin përpara derës hyrëse të parlamentit.