Denoncon Partia e Lirisë, publikon fotot nga Fllaka në Durrës: E mbytur me mbeturina! Meta: Abuzim me fondet publike

Kreu i Partisë së Lirisë, Ilir Meta ka bërë ditën e sotme një denoncim. Meta ka publikuar disa foto nga zona e Fllakës në Durrës, në të cilat shihet se kjo zonë është e mbushur me mbeturina. Partia e Lirisë akuzon se Njësinë Administrative Rrashbull e Bashkinë Durrës se nuk bën pastrimin e tyre si edhe nuk vendosin kosha plehrash. Sipas Partisë së Lirisë, kamionët zbrazin natën mbeturina dhe 120 familje aty pranë janë të detyruar të përballen me erën e plehrave.

“Kjo është pamja skandaloze plehrave në zonën e Fllakës, mes Durrësit dhe Tiranës ku banojnë rreth 120 familje të cilët janë të detyruar të përballen çdo ditë para shtëpive të tyre, me këtë pamje te tmerrshme dhe erën mbytëse! Këtu zbrazen kamionët e plehrave natën dhe Njësia Administrative Rrashbull e Bashkia Durrës nuk bën pastrimin e tyre, nuk vendos kosha të mbeturinave edhe pse banorët paguajnë rregullisht taksat! Kjo situatë alarmante nuk ka vëmendjen e pushtetit vendor, i cili çdo ditë bën tendera miliona lekë me paratë e qytetarëve te Durrësit”, shkruan Partia e Lirisë.

Meta thotë se kapja e pushtetit vendor nga Edi Rama ka sjellë mungesë të llogaridhënies nga Bashkitë dhe abuzim me fondet publike.

“Situata skandaloze në zonën e Fllakës, mes Durrësit dhe Tiranës, është një tjetër dëshmi e qartë e përçmimit dhe e braktisjes së plotë të qytetarëve nga pushteti vendor i “Rilindjes”. Kapja 100% e bashkive dhe parlamenteve lokale nga Edi Rama, natyrshëm që do të sillte këto rezultate: mungesë llogaridhënie, abuzime me fondet publike, mos dëgjim i zërit dhe i halleve të qytetarëve, braktisje të plotë të tyre deri edhe në falimentim të pushtetit vendor. Rikthimi i pashmangshëm i opozitës dhe i pluralizmit politik në Bashkitë tona, në aleancë me qytetarët shqiptarë, do të rikthejë llogaridhënien dhe pushtetin lokal në duart dhe në shërbim të tyre”, shkruan Meta.

SI.E./KT/Shqiptarja.com

TAG:
• Durres
• Ilir Meta
• Partia e Lirise