Vrasja e 14-vjeçarit Erald Xhejo në fshatin Pirg të Maliqit është filmuar nga kamerat e sigurisë të lokalit të fshatit, ku ndodhi edhe krimi. 

Të enjten (14 gusht) kur ndodhi tragjedia, i mituri shkoi në berberhane bashkë me një shokë, teksa aty pranë pa duke kaluar me makinë autorin e dyshuar. I fishkëllyen për ta ndaluar dhe nisën të sqaroheshin për debate të mëhershme që kishin pasur mbi motive banale, pse më sheh e pse më shan.

Në kulmin e konfliktit, autori i dyshuar, po 14 vjeç, tashmë i arrestuar nxori thikën. I frikësuar, viktima Erald Xhejo mori një karrige nga oborri i lokalit dhe e vendosi përpara trupit për t’u mbrojtur, por teksa bënte hapa pas, u pengua. Në këtë moment, autori e goditi me thikë në zemër, duke i shkaktuar plagë fatale.

Disa ditë më parë, autori kishte shkuar me makinë në fshatin Zvirinë dhe përpara lokalit të xhaxhait të viktimës xhiroi gomat e makinës dhe u largua, duke lënë pas një shenjë provokimi.

Për ngjarjen, policia arrestoi në total 8 persona, përfshirë babanë e autorit të dyshuar, i cili akuzohet se fshehu thikën e krimit.