Ngjarja bëri shumë bujë, ku më të prekurit ishin familjarët e dy deputetëve, që dhuruan “spektakël” në studio. Bashkëshortja e Zekës, gazetarja Edlira Qefalia Zeka, ka rrëfyer për emisionin “N’Kosovë Show” tronditjen që ka pësuar familja e saj, teksa shihnin në ekran përleshjen. Ajo kujton reagimin e vajzës, kur ka parë të atin të përleshet në ekran, duke thënë se i dithëron ende trupin dhe shpirtin.
“Mbaj mend që isha në këmbë para ekranit kur i shoh duke u rrok me llafe mes vedit. U bë një kakofoni e tmerrshme, nuk merrej vesh çfarë po thonin. Vajza ishte afër meje dhe në momentin kur Frashëri i gjuan me ujë Milaimit, ai ia fut me sendin e parë që ishte shishja e ujit bosh në dorë, ai u ngrit dhe i ra. Vajza ime u tmerrua. Reagimi i parë ishte të qante dhe të thoshte: ‘Babi, babi, babi…’. Reagimi i dytë, që erdhi më vonë, ishte: ‘Sot nuk u rrah babai im, sot u rrah Milaim Zeka, i cili në vetvete është dikushi për Kosovën.’ Ajo shprehje e vajzës sime, edhe tani ma drithëron trupin dhe shpirtin”, u shpreh bashkëshortja e deputetit.
Redaksia Online
D.Ç./Shqiptarja.com