Diaspora shkencore, Majko: Vendi ka nevojë për profesionistë, politika lë për të dëshiruar

Largimi i të rinjve dhe jo vetëm nga Shqipëria për arsye studimore, marrja e gradave shkencore jashtë vendit si dhe qëndrimi atje ka qenë në qendër të diskutimeve, gjatë një takimi të zhvilluar me mbështetjen e Ministrit të Shtetit nga Fondi Shqiptar për Zhvillimin e Diasporës dhe Instituti AlbShkenca. I pranishëm në takim ministri për Diasporën Pandeli Majko është shprehur se ka ardhur koha që diaspora shkencore të kthehet që të investojë në Shqipëri.

“Shqipëria zë vendin e parë që kanë studiuar dhe jetojnë jashtë. Janë rreth 2500 shqiptarë që janë jashtë vendit që kanë marrë ose janë duke marrë doktoratën në vendet e OECD. Ky potencial gjithmonë e në rritje i trurit të larguar duhet mobilizuar dhe duhet adresuar drejt vendlindjes ai e ka potencialin për të qenë një katalizator për zhvillimin ekonomik dhe social të vendit”  u shpreh Majko.

Teksa ka theksuar nevojën që ka vendi në shumë fusha të ndryshme për profesionistë, Majko ka deklaruar se politika nuk i ka kushtuar vëmendjen e duhur diasporës.

“Politika dhe sjellja e saj lë vend për të dëshiruar në lidhje me vëmendjen e saj ndaj komunitetit të shkencës. Tregimi i së vërtetës në politikë nuk është gjithmonë gjëja më e mirë. Shpesh Shqipërinë e quajmë “djep" por ajo nuk mund të jetë djep gjithë kohën. Sot Shqipëria ka nevojë për ide të reja, në sferën publike dhe atë private, në institucione shtetërore apo sipërmarrje private, në arsim në shëndetësi kudo”  tha Ministri i Diasporës.

Takimi i zhvilluar kishte si temë “Kërkimi shkencor në hapësirën mbarëshqiptare dhe roli i Diasporës shkencore”, ku kanë marrë pjesë Ministrja e Arsimit Besa Shahini, Ministri i Sipërmarrjes Eduart Shalsi, si dhe studiues dhe ekspertë nga shumë fusha të ndryshme, të cilët kanë diskutuar mbi mundësitë që diaspora shkencore të kthehet të investojë në vend.

/r.k./Shqiptarja.com

TAG:
• pandeli majko
• diaspora
• gradat shkencore