Protesta zbehet në ditën e 5-të! Tensione te Drejtoria e Policisë, protestuesit tentojnë të çajnë gardhin metalik te pema e Vitit të Ri, hidhet gaz lotsjellës! Disa të shoqëruar

Protestuesit i janë larguar nga sheshi "Skënderbej" pas hedhjes së gazit lotsjellës dhe i janë drejtuar Zogut të Zi. Protestuesit po ecin rrugëve të çorientuar pa pasur një itinerar konkret. Prania e tyre te Zogu i Zi ka shkaktuar kaos në trafik, ndërsa ka pasur edhe disa shoqërime të protestuesve nga forcat Shqiponja.

Protestuesit harrojnë thirrjet "Drejtësi për Klodjanin" dhe me dy gishtat lart dhe me thirrjet “Rroftë Sali Berisha”  i drejtohen drejtuar zonës së Bllokut në Tiranë. 

FNSH ka hedhur gaz lotsjellës në sheshin 'Skëndërbej' pasi protestuesit janë afruar dhe kanë tentuar të heqin gardhin metalik të vendosur rreth pemës së Krishtlindjeve.

Kur kanë kaluar rreth një orë nga nisja e protestës, edhe kësaj radhe nuk kanë munguar shkatërrimi i pronës publike. Tabelat e rrugës janë shembur, teksa nuk i kanë shpëtuar dhunës as stacionet e autobusëve. Siç shihet në pamjet që  Report Tv sjell, ku stacion i autobusit te kryqëzimi në hyrje të Bllokut, është dëmtuar totalisht, ku i janë thyer xhamat.

Shkatërrohet sinjalistika rrugore në ish- Bllok

Shkatërrohet semafori në ish- Bllok

Stacioni i autobusit në ish- Bllok

Fasada te ambasada ruse

 Disa të rinj i kanë vendosur zjarrin disa mbeturinave në rrugë, por kjo nuk është lejuar nga një tjetër qytetar në protestë, i cili ka vajtuar për ta shuar atë menjëherë.

Me dy gishtat lart, protesta në Lushnje nuk dukej si një organizim për të kërkuar drejtësi për Klodjan Rashën, të riun që u vra nga policia, por u ngjante protestave të thirrura nga opozita. Në sfond dëgjoheshin në kor thirrjet "Rama ik", ndërkohë që një nga organizatoret në mbyllje falenderoi pjesëmarrësit dhe u la takim për t'u mbledhur në protestat të tjera.

"Faleminderit për protestën dhe përfaqësimin e madh! Sot Lushnja tregoi që nuk i nënshtrohet diktaturës, nuk jetojmë dot të diktaturë. Natën e mirë dhe takohemi në protesta të tjera", tha ajo.

Pas hedhjes së gazit lotsjellës dhe moslejimit të kalimit të protestuesve te Drejtoria e Policisë, ata janë shpërndarë në kryqëzimin mes zonës së ish Bllokut dhe Drejtorisë së Policisë. Pas tensioneve për disa minuta, situata është qetësuar, ndërsa protestuesit po vijojnë të qëndrojnë në rrugë.

FNSH ka shoqëruar disa protestues pasi kanë tentuar të kalojnë në rrugën te Drejtoria e Policisë, por ajo ka qenë e bllokuar nga efektivë e policisë. Kjo ka bërë që të ketë tensione dhe të shoqërohen disa nga protestuesit.

Ajo që në fillim nisi si një protestë në emër të Klodjan Rashës, ku kërkohej drejtësi, tani ka nxjerrë në pah revoltën e të rinjve ndaj policisë.

Report Tv me gazetaren Eliza Gjediku ka pasur një komunikim me një nga protestuesit, i cili thotë se nuk është i nxitur nga asnjë parti politike. Ajo që e ka shtyrë që të dalë në shesh është dhuna psikologjike e fizike që uniformat blu kanë ushtruar! Sipas të riut, një student nga Tirana, Policia çalon në mënyrën e komunikimit dhe për këtë është i nevojshëm një ndryshim rrënjësor, jo vetëm largimi i ministrit të Brendshëm, Sandër Lleshaj apo Drejtorit të Përgjithshëm të Policisë së Shtetit, Ardi Veliu. 

"Unë jam student, jetoj në Tiranë. Kam parë lajmë që thonë janë militant partie, jam asnjanës nuk dua t'ia di për PS e PD. Kam dalë për dhunën psikologjike e fizike për ne, dje po më ndalonin 5 policë, duke më thënë "direkt që do të çojmë në rajon" kur unë dola për punët e mia. Dua të tregoj që nuk jam dakord me dhunë  psikologjike, kemi qenë të frustruar nga policiët. Unë jam njeri dhe jam dakord që policia është një profesion i vështirë, mënyra që çalon është komunikimi dhe sjellja, dua që të ndryshohet kjo frymë. Nuk është vetëm largimi i drejtorit të Policisë së Shtetit, duhet ndryshuar e gjithë struktura, nuk di si si mund të ndryshohet kjo gjë", tha ai, teksa vihet re se është i pajisur me shall e kapele, që e penon identifikimin e tij. 

Ndalur të dhuna e minorenëve që është raportuar në 4 protestat e kaluara, ai tha se nuk është dakord, por shtoi se kurrsesi nuk duhet të cilësohen si sjelle kriminale.

"Unë mendoj se janë disa veprime të tepruara, por jo aq sa të konsiderohen kriminale. Kemi parë gjithë këto vite që policia po i rreh minorenët, ato ca shohin ca bëjnë, nuk besoj se janë ndikuar nga forca politike, njoh shokët e mia, unë nuk dua tia di për Ramën, Berishën, Bashën. Unë jam sportist dhe e shoh që sporti nuk vlerësohet.  Nuk dua të iki jashtë për një të ardhme më të mirë. Prandaj jam sot në protestë", tha ai.

Ndërkohë, një protestues tjetër, minoren, tha se ka dalë në protestë për "të drejtat e tij", por nuk tha asgjë të drejtë që i është mohuar.

"Po protestoj për të drejtat tona", tha minoreni dhe u largua. 

Protestuesit nuk janë lejuar të hyjnë në rrugën e Drejtorisë së Policisë, ku FNSH ka krijuar një kordon në fillim të rrugës duke mos lejuar kalimin e protestuesve. Gjithashtu sapo protestuesit janë afruar është hedhur gaz lotsjellës dhe ujë për shpërndarjen e protestuesve. Gjithashtu protestuesit kanë hedhur gurë në drejtim të polcisë që kishin krijuar një kordon mbrojtës për të mos lejuar kalimin e tyre.

Protestuesit nga sheshi Skëndërbej janë nisur drejt Kryeministrisë. Ndryshe nga ditët e tjera numri i protestuesve është më i ulët dhe protesta po zhvillohet si një marshim paqësor. Në videon dhe fotot e siguruara nga Report Tv shikohet protesta me pamje nga lartë, ku numri i protestuesve është më 'i vakët' dhe se protesta ka nisur të zbehet në ditën e saj të 5-të. Ajo që nisi si protestë për vrasjen kundër Klodjan Rashës, sot kërkohet t'i jepet fund dhunës policore dhe të largohet Ardi Veliu.

Pas kritikave të shumta, organizatorët kanë ndryshuar strategjinë e protestës në sheshin ‘’Skënderbej’’, ku deri tani nuk ka asnjë prani dhunë, or thjeshtë një marshim i qetë i protestuesve të shoqëruar me thirrjet ‘’Rama ik’’ dhe “Shqipëri etnike”.

Ajo që vihet re, është pjesëmarrja e funksionarëve të Partisë Demokratike dhe Lëvizjes Socialiste për Integrim. Mes tyre është edhe kryetarja e LRI-së, Floida Kërpaçi. Edhe mbrëmjen e sotme përpara kryeministrisw janë mbledhur disa protestues ku siç duket nga pamjet, organizatorë janë ish-deputetja e LSI-së Floida Kërpaçi dhe ish- deputeti tjetër i LSI-së Përparim Spahiu.

Thirrjet "drejtësi për Klodjanin", në këtë protestë të pestë janë zëvendësuar me "Edi Rama halabak","Edi Rama skizofren". Ndërkohë, një nga protestuesit kanë kërkuar që të lirohen protestuesit e arrestuar.

Qytetarët e Cërrikut kanë protestuar mbrëmjen e sotme në një protestë paqësore ku kanë marshuar drejt qendrës. Gazetari i Report  Tv, Ronaldo Gjoshi raporton se protestuesit kanë bërë homazhe për Klodjanin duke ndezur qirinj së bashku me foton e tij.

Të kapur krahë për krahu, të rinjtë kanë zhvendosur protestën nga sheshi "Skënderbej" drejt Bulevardit "Dëshmorët e Kombit". Marshimi ka qenë kryesisht i qetë me thirrje "Rama ik", por nuk ka munguar në një moment kur një nga protestuesit ka thyer një nga tabelat e reklamave në rrugë.

Protestat e nisura prej disa ditësh të cilat janë shtrirë në të gjithë vendin, janë zhvilluar edhe  Sarandë.  Shoqëria civile, të rinj dhe minoren protestuan paqësisht në sheshin "Nënë Tereza".

Me qirinj dhe pankarta në duar ata kanë kërkuar drejtësi për Klodjan Rashën, i cili u vra nga një efektiv i policisë. Protesta ka zgjatur rreth 30 minuta dhe më pas të rinjtë janë shpërndarë.

Shqiptarët në Amerikanë kanë zhvilluar një protestë paqësore dhe homazhe duke ndezur qirinj për vrasjen e të riut Klodjan Rasha. Homazhet janë zhvilluar para Ambasadës shqiptare në SHBA, ku në murin e saj është vendosur foto e Klodjanit dhe janë ndezur qirinjtë. Në pankartat e diasporës shkruhet "stop dhunës" "Diaspora është me ju" etj.

Në mënyrë simbolike disa protestues janë shtrirë në rrugë në mënyrë që të mos dhunohen më nga policia.

Kanë filluar grumbullimet e para në sheshin "Skënderbej". Policia ka tentuar shpërndarjen  e tyre pasi nuk lejohen në grumbullimet në kohë COVID-i.

Policia: Shpërndahuni, nuk lejohen grumbullimet.

Gent Sejko: Polici që ka dalë jashtë kontrollit, po rrimë si qytetarë të lirë, ndërkohë që kur ishte pema e ndezur rrinin të gjithë grumbull. Kemi dalë të protestojnë, bëjnë mirë të mos provokojnë.

Protestuesi: Përgjegjësinë e ka Ardi Veliu, ai ka manipuluar provat. Ardi Veliu është munduar të manipulojë provat, ka 3 deklarata kontradiktore.

Thirrjes për të zhvilluar një protestë të pestë në emër të drejtësisë së Klodjanin i janë përgjigjur vetëm 4 persona në qytetin e Vlorës. Ato kanë dalë pasditen e sotme para Policisë së Vlorës me parulla dhe flamurin kuqezi.

"Është për të ardhur keq që qyteti jonë hesht për një kauzë kaq të madhe", tha njëri prej tyre.

"Do ta ushtrojmë të drejtën e protestës edhe nëse askush nuk na bashkohet".

"Kërkojmë të ndihemi të mbrojtur dhe jo të vritemi nga policia, duam largimin e drejtorit të përgjithshëm të policisë, ai është përgjegjës për dhunën policore".

"Jemi për të protestuar ndaj dhunës policore që është kthyer në formë konstante vitet e fundit dhe kërkojmë ristrukutimin e policisë dhe drejtësi për Klodjanin që u vra padrejtësisht nga polici".

"Po jetojmë në një kohë kur skandalet me policinë sa vjen dhe po thellohen. Policia ka keqvepruar me Astirin, teatrin, rrahën një 16-vjeçar dhe pastaj vranë një 25-vjeçar. Më është cenuar ndërgjegjja qytetare dhe duke më cenuar kjo është ajo që më ka detyruar që të dalë të protestojë, prandaj kërkojmë dorëheqjen e zinxhirit drejtues të Policisë së Shtetit", thonë protestuesit.

Ndërkohë që gjithë vendi ditët e fundit është përfshirë nga protesta paqësore por edhe me incidente, qytetarët vlonjatë qëndruar në heshtje me përjashtim të disa organizimeve të FRPD dhe LRI.

KRUJË- Pak para nisjes së protestës së pestë në emër të Klodjan Rashës, Policia ka ngritur postblloqe në dalje të Fushë- Krujës.

Report Tv mëson se kontrollet me qëllimin identifikimin dhe ndalimin e elementëve problematik që posedojnë sende të forta apo armë.

Kontrollet i janë nënshtruar automjeteve private, por edhe furgonëve e autobusëve që transportojnë pasagjerë