Kryeministri Rama vijon vizitën e tij në Izrael, e cila përfundon sot. Sipas axhendës së publikuar më parë, është parashikuar pjesëmarrja e tij në Konferencën Ndërkombëtare për Luftën kundër Antisemitizmit ku do të mbajë një fjalë në praninë e Presidentit të Izraelit, Isaac Herzog.

Kjo konferencë është edhe motivi kryesor i vizitës në Jeruzalem, e cila nisi më 25 janar.

Gjatë kësaj vizite, kryeministri është shoqëruar nga bashkëshortja, Linda Rama dhe delegacioni.

Një ditë më parë, ai vizitoi Murin e Lotëve në Jeruzalem dhe më vonë mbajti një konferencë të përbashkët me homologun izraelit, Benjamin Netanyahu. Gjatë fjalimit, u njoftua se më 27 janar do të çelej Dhoma e Tregtisë në Jeruzalem për përforcimin e lidhjeve ekonomike mes vendeve.

Konferenca u pasua nga prania e tij në seancën plenare të Knessetit si i ftuar nderi për të mbajtur një fjalim.

Në fjalim, Rama tha se shqiptarët u bënë streha e qindra hebrenjve, të cilët nuk i dorëzuan. Ai theksoi se Shqipëria është i vetmi vend që doli nga Lufta e Dytë Botërore me numrin më të madh të hebrenjve të strehuar.

Ai nënvizoi mbështetjen ndaj Izraelit duke thënë se në Rripin e Gazës nuk mund të ketë paqe pa çarmatosjen e Hamasit.

 

Rendit zhvillimet sipas orarit:
Ora 08:24
Rama ndan fotot nga “dita kyçe” e vizitës në Izrael: Shqipëria u vendos në piedestalin e respektit më të lartë! Dhurata e veçantë për kryeparlamentarin izraelit

Kryeministri Rama ka ndarë në rrjetet sociale disa prej momenteve të ditës kyçe të vizitës së tij në Izrael, 26 janarit. Ditën e djeshme, kryeministri mbajti një fjalim në Knessetin izraelit si i ftuar nderi.

Ai u prit bashkë me bashkëshorten, Linda Rama, nga kryetari i parlamentit, Amir Ohana.

“Mirëmëngjes, dhe me fotoalbumin e një dite kyçe të vizitës në Izrael, ku Shqipëria u vendos në piedestalin e respektit më të lartë, si edhe me tekstin e fjalës së adresuar Parlamentit të Izraelit në sesionin special si i ftuar nderi, ju uroj një ditë të mbarë!”, shkruan Rama në postim, ku ka përfshirë edhe fjalimin e plotë.

Në foto shihet edhe një moment kur kryeministri i dhuron Ohana-s atlete me flamurin shqiptar.

Gjatë fjalimit në Knesset, Rama përmendi lidhjen e fortë mes Shqipërisë dhe Izraelit për strehimin e hebrenjve gjatë Luftës së Dytë Botërore. Ai theksoi mbështetjen ndaj Izraelit dhe tha se s’mund të ketë paqe në Rripin e Gazës pa çarmatosjen e Hamasit, teksa bëri thirrje që të dy popujt të gjejnë një rrugë paqeje e dinjiteti.

Vizita e kryeministrit në Izrael përfundon sot (27 janar) me një fjalim në Konferencën Ndërkombëtare për Luftën kundër Antisemitizmit, në prani të Presidentit të Izraelit, Isaac Herzog. 

 

 

P.J/Shqiptarja.com