Dita e Ujit të Bekuar, mijëra besimtarë në Kishën Ortodokse! Besimtarja: ritualin e kam kryer fshehurazi në komunizëm!

“Ndodhemi në katedralen 'Ngjallja e Krishtit' në Tiranë, ku po kremtohet një nga ditët më të rëndëssishme të kalendarit kishtar ortodoks: pagëzimi i Zotit Krisht dhe Uji i Bekuar. Qindra besimtarë kanë ndjekur liturgjinë hyjnore dhe tashmë po presin ceremoninë e madhe të Shenjtërimit të Ujit, ku do të marrin Ujin e Bekuar dhe do ta ruajnë përgjatë një viti.”

Kjo zonjë është një besimtare e devotshme me origjinë nga Myzeqeja që tregon për Report TV, se e kanë ndjekur këtë ritual dhe në periudhën e komunzimit, kur feja ishte e ndaluar.

“Ne ditën e Ujit të Bekuar therrnim shpendë në shtëpi. Unë jam nga Divjaka. Dhe kokën e gjelit e hidhnim në një vend që kishte ujë dhe atje mbushnim ujë. Sot hedhim kryqin.”, - thotë ajo. 

LEXO EDHE:
Kryepeshkopi i Shqipërisë, Anastasi vijon të jetë në gjendje kritike! Prej 3 janarit ndodhet i shtruar në spitalin 'Ungjillëzimi' të Athinës

Në këtë ditë të gjtiha ujërat që rrjedhin janë të bekuara.

“Çdo ujë në datën 6 uji është i bekuar. Kush nuk mund të vijë këtu mund ta mbushë edhe në çezmën e tij. Ujin e ka bekuar Perëndia për t’i dhënë njerëzimit jetën, prandaj ka shumë vlerë dita e Ujit të Bekuar.”, - vijon gruaja.

Por cila është vlera e Ujit të Bekuar dhe përse e përdorin besimtarët?

“E marrim ujin e bekuar dhe spërkasim të gjithë të afërmit e familjes, shtëpinë, që të kemi mbarësi për gjithë vitin. Për çdo lloj sebepi, çdo sëmundje e përdorim këtë ujë.”, - rrëfen zonja.

Ndërsa një grua tjetër vëren se ky është një ritual i trashëguar.

“Me thënë të drejtën unë bëj atë spërkatjen, diku e lë në një pikë, që mund ta hedh në lule dhe cepat e shtëpisë. Ky është rituali i trashëguar.”

Për teologun Thoma Çomeni kjo ditë është një lloj thirrjeje për të ndryshuar dhe për t’u larë nga mëkatet.

“Për besimtarët orthodoksë është dita e Epifanias, Theofanit, por për popullin njihet si dita e Ujit të Bekuar. Është dita kur Zoti Jezu Krisht u pagëzua në lumin Jordan, për të dhënë dëshminë e madhe të rëndësishme, që njeriu vërtet vjen në jetë, por në momente të caktuara duhet që të marrë një vendim dhe të ndryshojë e të krijohet ajo që quhet larje. Jezu Krishti erdhi dhe i dha popullit që ndiqte një urdhër, një mënyrë për të jetuar: larja, pagëzimi me ujë dhe me frymë.”, - thotë Çomeni. 

Dita e Ujit të Bekuar u kremtua nga besimtarët e shumtë në mbarë vendin.

“Quhet uji i bekuar, sepse ai ujë ruhet për 365 ditë në mënyrë që nuk prishet.”, - thotë një zotëri.

“E spërkas shtëpinë gjithandej.”, - shpjegon një grua.

“Me ujin lajmë fytyrën, këmbët jo dhe brenda, atje ku jep lutjet. Ujë i fuqishëm, jo për mua, po për të gjithë popullin.”, - thotë një grua nga Gjirokastra.

“Spërkatim shtëpinë, bëjmë kryq në ballë.”, - shpjegon një grua nga Korça.

Nëpërmjet pagëzimit nga njëra anë, marrjes së ujit, pirjes së tij dhe spërkatjes me ujë – kjo ditë na tregon që uji është pjesë e rëndësishme e jetës.

B.G/I.M/Shqiptarja.com

TAG:
• uji i bekuar
• thoma comeni
• kisha ortodokse