Dogjën Kuranin dhe fyen profetin, Irani ekzekuton dy burra të dënuar për blasfemi

Irani ka ekzekutuar dy burra të cilët u dënuan për djegie të Kuranit dhe fyerje të Profetit të Islamit.

Autoritetet gjyqësore të Iranit theksojnë se Yousef Mehrad dhe Sadrollah Fazeli-Zare drejtuan dhjetëra llogari të mediave sociale kushtuar ateizmit dhe përdhosjes së librit të shenjtë.

Avokatët e dy të ekzekutuarve këmbëngulën se dënimi i dhënë ndaj tyre ishte i padrejtë.

Një grup i të drejtave të njeriut i quajti ekzekutimet e tyre "një akt mizor nga një regjim mesjetar".

Ka pasur një rritje të ekzekutimeve në Republikën Islamike mes trazirave të vazhdueshme antiqeveritare, por ato për dënime për blasfemi janë të rralla. Yousef Mehrad dhe Sadrollah Fazeli-Zare u varën në burgun Arak në Iranin qendror të hënën në mëngjes.

Dy burrat u arrestuan në vitin 2020 dhe u akuzuan për drejtimin e një kanali të quajtur "Kritika e bestytnive dhe fesë". Ata u mbajtën në izolim për dy muajt e parë dhe iu mohua aksesi ndaj një avokati.

Irani është i dyti vetëm pas Kinës për nga numri i ekzekutimeve të kryera çdo vit.

Numri i ekzekutimeve u rrit me 75% vitin e kaluar, pasi autoritetet u përpoqën të përhapnin frikën midis atyre që merrnin pjesë në protestat mbarëkombëtare të shkaktuara nga vdekja në paraburgim e Mahsa Aminit në shtator.

B.V/Shqiptarja.com

TAG:
• iran