Berisha: I ke minutat e numëruara! Rama: Krizë artificiale, s'ka zgjedhje të parakohshme

Kryeministri Edi Rama qëndron i palëkundur në idenë se nuk ka zgjedhje të parakohshme dhe se kriza që ka prodhuar opozita me dorëheqjet nga Kuvendi dhe protestat e dhunshme është artificiale.  "Më vjen keq që për fat të keq këto imazhe janë përhapur, që kanë dhënë përshtypjen e një vendi që është në krizë, ka një krizë politike artificiale, të krijuar dhe të dashur nga një opozitë që duhet të përballet me zgjedhjet e qershorit dhe është tepër mbrapa me sondazhet, ka humbur para një viti në zgjedhjet që janë pranuar edhe nga opozita.

Në rrugëtimin drejt Europës kemi nevojë për stabilitet. Kjo është një situatë mjaft e panjohur, nga ajo që cfarë kam shfletuar në librat e historisë, ka ndodhur në Italinë e viteve '20 dhe në asnjë vend tjetër. Sikur opozita në Itali, të thoshte duam një qeveri ndryshe se nuk mund të fitojmë me këta, dhe do të ikim, do të largohemi dhe duam zgjedhje të parakohshme, por kjo është një gjë që nuk funksionon. Nëse do të thosha se korrupsioni nuk është problem do të thosha një gjë jo të vërtetë, por është duke u luftuar si asnjëherë më parë. Në raportin e KE, vjet u rekomandua çelja e negociatave, pasi ne kemi luftuar korrupsionin, i jemi futur një reforme në gjyqësor që është model për të gjithë rajonin.

Unë nuk jam njeriu i duhur për ta pyetur nëse është e vërtetë apo jo, por pyesni GdF nëse kemi bërë një pastrim të plotë të kultivimit të kanabisit. Dua t'u them të gjithë italianëve, që të kuptojnë një gjë; nuk ka revolucion, por revoltë e estabilshmentit të vjetër që ka humbur dhe lobit të drogës që ka humbur, bixhozit dhe lobeve të tjera që qëndrojnë pas këtyre. Jeta vijon dhe ne duam të ecim drejt BE-së" tha Rama në një prononcim për mediat italiane, "TG2 Post". Ndërkohë që ish-kryeministri Sali Berisha është shprehur se Rama i ka minutat e numëruara. "Situata është në rrezik të lartë shpërthimi sikur e shikoni në rrugë, qeveria ka zëvendësuar plantacionet normale me ato të kanabisit. Ky është një revolucion. Edi Rama i ka minutat të numëruara" tha ai.

Ish kryeministri italian Massimo D'Alema e ka cilësuar papërgjegjshmëri vendimin e opozitës për të djegur mandatet dhe për të protestuar në mënyrë të dhunshme. Ai u bën thirrje aktorëve politikë në Shqipëri dhe Presidentit Meta që të kapërcejnë këtë situatë, pasi rrezikon të tashmen dhe të ardhmen e vendit. "Nuk jemi përballë një revolucioni. Jemi përballë një lëvizje, që drejtohet nga një opozitë që ka bërë një zgjedhje të papërgjegjshme. Ne jemi miq të Shqipërisë dhe kështu them se ka një zgjedhje jo të përgjegjshme. Vendimi i opozitës nuk ka mbështetje. I bashkohem zërit të delegacionit të PE që ishte sot në Shqipëri. Vendi ka bërë progres.

Shqipëria është në rrugën e drejtë për në BE, ajo që po ndodh përfaqëson një dëm të madh. Do të doja që të mbizotëronte ndjeja e përgjegjësisë. Opozita të zgjidhte rrugën e konfrontimit demokratik.  Presidentin e Republikës e njoh prej vitesh dhe i bëj një thirrje, e ftoj, sepse Shqipëria po ecën në drejtimin e duhur, do të ishe e gabuar ti mohonim. Ajo që po ndodh rrezikon që ti bëjë një dëm shumë të madh Shqipërisë. Ne kemi qenë pranë Shqipërisë në të gjitha vështirësitë. I kemi ndihmuar në luftën e Kosovës. Dua të them se kemi shumë shqiptarë tek ne, por edhe italianë që kanë emigruar atje. Është një vend shumë ndryshe nga sa kemi njohur në të kaluarën dhe nuk duam të kthehet në të kaluarën" deklaroi ai.

TAG:
• edi rama
• djegia e mandateve
• Massimo D'Alema