Duro kundër skemës stoike të Reja-s: Duhen ndryshime në formacion, kundër Izrealit kujdes me euforinë

Klodian Duro, ish-futbollist i kombëtares, është në anën e atyre që Edy Reja nuk duhet të jetë besnik i skemës 5-3-2. I ftuar në Report TV debatit më të zjarrtë për momentin te kombëtarja iu përgjigj kështu:

“Për ta fituar një ndeshje normalisht që mund të jesh i bindur te skema jote, por ajo që sjell loja dhe fusha duhet të jesh më fleksibël për të manovurar,”-u shpreh Klodian Duro, ish-futbollist i kombëtares.

Në ndeshjen e parë të Ligës së Kombeve kundër Islandës që u mbyll 1-1 Duro pa në veçanti një repart që kishte çaluar.

“Ajo që më tepër pres është një ndryshim në mesin e fushës, pasi është reparti që jep frymëmarrje jo vetëm mbrojtjes, por mbi të gjitha për pasin e fundit,”-tha Klodian Duro, ish-futbollist i kombëtares.

Sonte kuqezinjtë përballen në orën 20:45 kundër Izrealit dhe sipas Duros kombëtarja duhet të bëjë kujdes me euforinë.

“Nuk është e lehtë, ndoshta pak edhe nga natyra mesdhetare kërkojmë të jemi euforik që në fillim që të realizojmë dhe të shkojmë te fitorja. Unë mendoj se duhet mendje e ftohtë, një taktikë e qartë për të shkuar te goli dhe më pas te fitorja,”-deklaroi Klodian Duro, ish-futbollist i kombëtares.

Duro, ashtu si shumë specialistë të fushës, mendon se kjo kombëtare ka një potencial të madh dhe përbëhet me futbollistë kualitativ, përfshirë këtu edhe sulmin që has shumë vështirësi në finalizim.

“Me rikthimin e Brojës, i cili ishte i padisponueshëm në Islandë, Uzunit, por edhe me Balajn, Seferin dhe Cikalleshin mendoj se kemi kualitet në sulm,”-u shpreh Klodian Duro, ish-futbollist i kombëtares.

Ne.k./Sh.Sh/Shqiptarja.com

TAG:
• kombetarja
• klodian duro
• Liga e Kombeve
• izraeli