Një urdhër i mbërritur gjatë ditëve të fundit nga Ministri i Bujqësisë Niko Peleshi ka vënë në lëvizje Autoritetin Portual të Durrësit. Urdhërohej largimi i skafeve, gomoneve dhe jahteve nga porti i ri i peshkimit.

Ndonëse ky port nuk plotëson kushtet teknike si dhe nuk ka kapacitetin e nevojshëm për të strehuar flotën e peshkimit, ai teknikisht është boshatisur për ti lënë vendin peshkarexhave.

Por në fakt, një urdhër i tillë u mor fill pas ardhjes nga Italia të përgjimeve për trafikun e drogës i cili është realizuar me anë të mjeteve detare, skafe dhe gomone.

Pronarët e disa dhjetëra mjeteve lundruese të ankoruar në këtë port prej vitesh,morën urdhër në fundjavë që të largoheshin nga porti i Durrësit.

Gomonet dhe skafet u transportuan kryesisht me rrugë tokësore duke u vendosur nëpër karrela e duke u tërhequr nga automjete të fuqishme, ndërsa jahtet lundruan në jug të vendit dhe një pjesë tjetër në drejtim të porteve malazeze ku edhe do të dimërojnë.

Gjithëçka është regjistruar nga policia kufitare, bëjnë me dije burime konfidenciale nga Autoriteti Portual Durrës.

Në këtë port janë investuar 11 milion $, në mënyrë që flota e peshkimit të largohej nga rreziku i trageteve, gjë që nuk është realizuar.

Redaksia Online
Xh.F/Shqiptarja.com