Dyshohet se strehonte të shumëkërkuarin Talo Çela, arrestohet 60-vjeçari në Elbasan! Në banesën e tij u gjetën mijëra paund e euro dhe arsenal armësh

Një oeracion i Policisë së Elbasanit ka vënë në pranga Aqif Bezatin, 60 vjeç, i dyshohet se strehonte të shumëkërkuarin Talo Çela në një prej pronave të tij. Në momentin që është ndërhyrë në një banesë në fshatin Deshiran, Belsh, nuk u gjet asnjë gjurmë e Celës, por vetëm sasi e madhe parash, arsenal armësh dhe kanabis.

Policia kishte marrë informacione në rrugë operative se dihej vendndodhja e Talo Celës, por edhe ky rast për të cuar pas hekurave të shumëkërkuarin dështoi.

Në njoftimin e policisë së Elbasanit theksohej se në banesën e Bezatit janë gjetur dhe sekuestruar: një armë zjarri kallashnikov, një pistoletë, 6 granata dore, 3280 fishekë pistoletë dhe kallashnikovi, 5 krehra fishekësh, 3.6 kilogramë  kanabis, 75 bimë të thata të dyshuara opium, 3.760.000 lekë të rinj, 5000 paund dhe 8950 euro, të cilat dyshohet se i ka përfituar nga veprimtaria kriminale në fushën e narkotikëve dhe të trafikimit të armëve.  

Në pranga ka rënë dhe një person tjetër i identifikuar si Veli Deliu,  i cili ka lidhje shoqërore me Bezatin. Gjatë kontrollit në banesën e tij u gjetën dhe sekuestruan një armë gjahu dhe 55 fishekë arme gjahu, të cilat Veli Deliu i mbante pa leje.

Talo Çela, i shumëkërkuari i policisë doli edhe në dëshminë e të penduarit të drejtësisë Nuredin Dumani në dosjen 'Plumbi i Artë'. Ai zbuloi se ka kryer krimet më të shumta me Çelën dhe dy ortakët njiheshin me pseudonimet Lala dhe Bubi, pjesë e të njëjtit grup kriminal, por që shoqëria mes tyre mori fund pas grabitjes në aeroportin e Rinasit, për ndarjen e 4.3 milionë euro.

A.M./Shqiptarja.com

TAG:
• veli deliu
• belsh
• talo cela
• aqif bezati
• Elbasan
• operacioni golden bullet