Sipas raportimeve të fundit nga Gjermania, Barcelona ka nisur të ndjekë me vëmendje zhvillimet rreth sulmuesit të Kosovës, Fisnik Asllani (23 vjeç), i cili po spikat me paraqitjet e tij në Bundesligë me Hoffenheim dhe shihet si një investim premtues për të ardhmen e klubit katalanas.

Asllani, që ka treguar formë në rritje dhe pjekuri në lojën e tij, ka në kontratë një klauzolë lirimi që aktivizohet gjatë verës së ardhshme, një detaj që e bën atë një objektiv tërheqës për skuadrat që kërkojnë të përforcojnë repartin sulmues.

Sipas Sky, Barcelona është zyrtarisht e informuar për këtë klauzolë dhe po e monitoron situatën nga afër, pa bërë ende hapa konkretë drejt një marrëveshjeje.

Asllani: Barcelona është klubi im i ëndrrave

Në një intervistë të dhënë së fundmi për median gjermane, vetë sulmuesi dardan nuk e ka fshehur dashurinë e tij për klubin katalanas. “Klubi im i ëndrrave ka qenë gjithmonë Barcelona. Gjithmonë kam dashur të luaj aty”, ka deklaruar Asllani për Sport Bild.

Edhe pse negociata zyrtare ende nuk ka, fakti që Barcelona ka nisur monitorimin e tij tregon se 23-vjeçari mund të bëhet një nga emrat më të përfolur të afatit të ardhshëm kalimtar.