SHKODËR - Pakujdesia e prindit për pak sa nuk i ka kushtuar jetën një fëmije 5-vjeçar në lagjen 'Skenderbeg' të Shkodrës, ku teksa udhëtonte në makinë me babanë  tij, 5-vjeçari  S.Kurtaj ka hapur xhamin e dritares së pasme dhe ka rënë në rrugë pranë vendit të quajtur Ura e Bardhajve. Ndërkohë babai i 5-vjeçarit, Hilmi Kurtaj nuk e ka vënë re djalin e tij që kishte rënë nga makina dhe ka vijuar udhëtimin me 3 fëmijët e tjerë që ishin në makinë.

Ka qenë një shofer i rastit me një automjet tip 'Benz' i cili ka gjetur 5-vjeçarin në gjendje kritike për jetën në mes të rrugës, ku më pas e ka marrë dhe e ka transportuar në urgjencën e spitalit të Shkodrës, ku ndodhet nën kujdesin e mjekëve.

Pak minuta më pas babai 50-vjeçar ka kuptuar se çfarë kishte ndodhur dhe ka mësuar së fëmijën e ka në spitalin e Shkodrës ku  ka shkuar për të mësuar mbi fatin e tij. Ai ka thënë se nuk e ka ndjerë se fëmija i kishte rënë nga makina dhe kështu kishte vazhduar rrugën për disa kilometra.

Ndërkohë mjeku i Urgjencës së Spitalit të Shkodrës është shprehur se fëmija është në reanimacion dhe ka dëmtime në pjesën e pasme të kokës. Deri tani po mbahet nën vëzhgim intensiv të mjekëve dhe nuk mund të thuhet nëse e ka kaluar ende rrezikun për jetën.
Rendit zhvillimet sipas orarit:
Ora 18:44
Ra nga makina, flet mjeku i urgjencës: Fëmija ka marrë plagë pas koke, është në reanimacion

Mjeku i Urgjencës në Shkodër është shprehur se fëmija 5-vjeçar i cili ra nga xhami i pasmë i makinës së babit të tij është në gjendje të rëndë dhe është futur në reanimacion, pasi ka marrë dëmtime në pjesën e pasme të kokës.

Mjeku Astrit Lahi është shprehur se është herët për të thënë nëse e ka kaluar gjendjen kritike për jetën, megjithatë mjekët po bëjnë ekzaminimet e nevojshme herë pas here për të parë gjendjen e tij.

"Gjendja e fëmijës është praktikisht e rëndë si pasojë  e një traume. Pa koshiencë, ishte gjendur nga qytetarët në rrugë. Kishte plagë në pjesën e pasme të kokës dhe me çrregullime të frymëmarrjes. Është në egzaminime në vazhdimësi. Për momentin është në reanimacion. Është herët me fol, se paraqet shenja. E sollën qytetarët të rrëzuar. Nuk kishin as informacion për të. Është paraqitur edhe i ati i cili na ka thënë se ka rënë nga xhami i pasmë. Dëmtimin fëmija e ka pas koke' tha Shefi i Urgjencës, Astrit Lahi.  

Ora 18:10
U gjet në rrugë në gjendje të rëndë pasi ra nga xhami i makinës, flet babai i fëmijës: Nuk e dalluam...udhëtoja me 4 fëmijët


Babai i fëmijë 5 -vjeçar që ra nga xhami i pasmë i makinës, ka shkuar menjëherë në spitalin e Shkodrës, për të marrë vesh mbi djalin e tij.

Ai është shprehur se nuk e ka ndjerë fare se fëmija i ka rënë nga makina dhe ka vijuar rrugën. Ndër të tjera babai 50-vjeçar Hilmi Kurtaj është shprehur se në makinë përveç djalit 5-vjeçar, S.Kurtaj udhëtonin edhe 3 fëmijët e tjerë të tij.