POP 5

Lajmet më të lexuara të 5 minutave të fundit

Sociale

Alesia e vetme në shkollën e rrënuar! Nxënësja nga Kolonja kërkon mësues, askush nuk pranon të japë mësim në fshatin e thellë Boshanj

Në fshatin Boshanj të Kolonjës ka mbetur vetëm një nxënëse. Shkolla qendron e mbyllur pasi asnjë mësues nuk shkon të japë mësim për shkak të godinës së rrënuar të shkollës dhe rrugës së fshatit pa asfalt. Për pasojë, Alesia, nxënëse e klasës së katërt ka mbetur pa mësim. Nëna e saj, përmes Report TV kërkon nga Drejtoria Arsimore të emërojë sa më shpejt një mësues për të bijën.

Me çantën në shpinë, Alesia vjen çdo ditë në orën 08:00 në shkollë.Qëndron në oborr dhe më pas dëshpërimisht kthehet në shtëpi. Për vogëlushen nga fshati Boshanj i Kolonjës ende nuk ka nisur viti shkollor.

9-vjecarja bashkë me nënën e saj, Brisilda Halili na tregojnë ambientet e rrënuara të shkollës. Muret e çara, suvaja e rënë, pa energji elektrike dhe me banka të shkatërruara.

Alesia këtu ka zhvilluar mësim deri në klasë të tretë, por më 11 shtator kur duhet të niste klasën e katërt nuk u paraqit asnjë mësues.

“Jo nuk kam bërë mësim se nuk e kam mësuesin. Mami më ka thënë mos hajde kot, por unë dal çdo ditë në 8:00 dhe shikoj nëse ka ardhur”, tha Alesia.

Brisilda Halili, nëna e Alesias kërkon një mësues edhe pse godina rrezikon t’i zërë brenda. Nuk ka asnjë zgjidhje tjeter! Shkolla e Ersekës është 20 kilometra larg fshatit dhe ajo s’ka mjet transporti për ta transferuar në qytet. Drejtoria Arsimore i ka ofruar edhe konvikt në Ersekë, por Alesia është ende e vogël për të qendruar larg nënës.

“Dua mësues patjeter për vajzën se më vjen gjynah për të. Si gjithë moshatarët e saj duhet të shkojë në shkollë. Kushtet këtu janë skandaloze por skam çfarë të bëj. E kam bërë ankesen por asgjë nuk po bëhet”, u shpreh Brisilda Halili.

Nga ana tjetër kryeplaku i fshatit Boshanj thotë se dikur shkolla ka pasur shumë nxënës, por këtë vit ka mbetur vetëm Alesia. Ndërsa godina ka degraduar sepse prej dekadash nuk është rikonstruktuar.

“Këtu ka vetëm një nxënës, ndërsa mësues nuk ka fare. Për këtë vit nuk është lyer as sistemuar. Më parë në këtë shkollë kanë qenë 60 nxënës. Pasi erdhi demokracia u ul numri i nxënësve. Ndërsa vitet e fundit është shkatërruar plotësisht. Nxënësja e vetme s’ka ku mëson”, tha Dashamir Halili kryetar i fshatit.

Zyra Vendore Arsimore Kolonjë bën të ditur se është hapur një thirrje për mësues në portal dhe kanë shprehur gadishmërinë 6 mësues, por procedurat e emërimit do vonojnë edhe disa ditë. Të njëjtat burime konfirmojnë se mësuesit që kanë qenë më herët të punësuar në këtë shkollë kanë braktisur vendin e punës për shkak të rrugës së paasfaltuar dhe godinës së shkollës që rrezikon të shembet.

Ndërkaq edhe 2 shkolla të tjera në këtë zonë mbeten hapur vetëm me një nxënës, konkretisht shkolla e Fshatit Vodicë dhe Shkolla e Fshatit Shalëz, ndërsa ka dhe shkolla të tjera në Kolonjë që kanë vetëm nga 2 nxënës.

M.T/r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    20 Nëntor, 13:18

    Vrasja e 14 vjeçarit, çfarë duhet të bëjë Shqipëria me TikTok e Snap Chat?

Lajme të tjera



×

Lajmi i fundit

Kreshnik Spahiu: Pse Strasburgu po e zhgënjen shumë keq Partinë Demokratike?

Kreshnik Spahiu: Pse Strasburgu po e zhgënjen shumë keq Partinë Demokratike?

23 Nëntor, 23:55 nga Kreshnik Spahiu