POP 5

Lajmet më të lexuara të 5 minutave të fundit

Opinion

Editorial/Si një parti unike, që ditën
e parë PD-PS godasin lirinë e medias

Ky mund të konsiderohet lehtësisht si një sulm i paprecedent dhe skandaloz, tani që Shqipëria nuk ka realisht opozitë politike, kundër medias, e cila do të detyrohej të vinte burimet e veta material, financiare, njerëzore dhe teknike, në dispozicion të partive politike që bëjnë fushatë
Editorial/Si një parti unike, që ditën<br />e parë PD-PS godasin lirinë e medias
Pasoja e parë e pranimit të Partisë Demokratike në gjirin e një qeverie te majte të cilët palët e quajnë teknike, në mënyrë befasuese ishte imponimi me ligj televizioneve private që të transmetojnë me detyrim dhe pa asnjë pagesë propagandë partiake gjatë fushatës zgjedhor.

Ky mund të konsiderohet lehtësisht si një sulm i paprecedent dhe skandaloz, tani që Shqipëria nuk ka realisht opozitë politike, kundër medias, e cila do të detyrohej të vinte burimet e veta material, financiare, njerëzore dhe teknike, në dispozicion të partive politike që bëjnë fushatë. 

Një akt i tillë nuk është ndërmarrë kurrë më parë në historinë 27-vjeçare të demokracisë së brishtë shqiptare.

Televizionet private, ndryshe nga televizioni publik TVSH, i paguajnë një licensë shtetit, që u jep atyre të drejtën të administrojnë sipas këndvështrimit dhe vlerësimit të tyre dhe në përputhje me lirinë e sipërmarrjes, frekuencën që u vihet në dispozicion “me qira” nga shteti. Duke patur si të vetmin detyrim që të respektojnë ligjet. Po asnjë ligj në një vend demokratik nuk mund kurrsesi t’i imponojë një televizioni privat atë se çfarë të transmetojë.

Arroganca e këtij akti të ndërmarrë nga PS dhe PD bëhet edhe më e rëndë kur fjala është për transmetimin e propagandës politike dhe produkte të partive. Ky vendim bie në kundërshtim flagrant me direktivat e OSBE/ODIHR, të cilat synojnë të ndalojnë partitë politike të japin nëpër televizione private mesazhe të regjistruara nga vetë ato. Një praktikë kjo, shumë e përhapur në Shqipëri, por që sot, madje, po vendoset që të imponohet edhe me ligj.

Kjo nismë bie në kundërshtim edhe me ligjin për mediat, si dhe me Kodin Zgjedhor, që përcakton që vetëm TVSH mund të përdoret falas nga ana e partive politike nëpër fushata zgjedhor, pikërisht për arsyen se ajo është një media që financohet me para publike.

Tani që përkohësisht partitë vendosën ta lenë vendin pa opozitë, për një të mirë më të madhe për vendin dhe qytetarët, çuditërisht pjella e parë e marrëveshjes PS-PD është një akt që cenon lirinë e shtypit, duke vendosur imponimin me ligj të përdorimit të subjekteve mediatike private për të bërë fushata elektorale gratis në favor të partive. Që në Shqipëri dikur ka ekzistuar një kohë e tillë, kur televizioni përdorej kështu, këtë e dimë të gjithë, por kjo datonte para 1991-ës. Mos vallë liderët e dy partive kryesore politike e konsiderojnë veten, tani që arritën të pamendueshmen, si diktatorë dhe mendojnë se kanë shpallur një diumvirat, të aftë për të ndryshuar ligjet sipas qejfit?
Madje, duke shkelur të drejtat themelore demokratike si ajo për lirinë e fjalës dhe shtypit? Kjo rrëshqitje në nonsens duhet të anulohet sa më parë, në rast se nuk duam adoptimin e metodave që nuk kanë asgjë të përbashkët me demokracinë.

Redaksia Online
(Shqiptarja.com)

  • Sondazhi i ditës:
    25 Nëntor, 08:30

    Takimet jashtë, mendoni se diaspora do marrë pjesë masivisht në votime?

Lajme të tjera



×

Lajmi i fundit

Operacioni i SPAK, arrestohet në Itali 'truri financiar' Bujar Shega! Kush është biznesmeni nga Peqini dhe lidhjet e tij me Suel Çelën

Operacioni i SPAK, arrestohet në Itali 'truri financiar' Bujar Shega! Kush është biznesmeni nga Peqini dhe lidhjet e tij me Suel Çelën

25 Nëntor, 18:08