Eduard Zaloshnja: Tri dallgë që priten së afërmi në terren për Policinë e Shtetit

Eduard Zaloshnja: Tri dallgë që priten së afërmi në terren për Policinë e Shtetit

Qysh nga maji i vitit 2018, kam zhvilluar sondazhe periodike në kuadër të barometrit për opinionin e shqiptarëve mbi punën e Policisë së Shtetit, të financuara nga projekti i qeverisë suedeze SCPA dhe nga UNDP. Si rrjedhojë, e kam ndjekur edhe vetë punën e saj në terren.

Nga zhvillimet e fundit, pres tri dallgë që do të vijnë së afërmi për Policinë e Shtetit.

Së pari, pas amnistisë penale të votuar me shumicë absolute në Kuvendin e Shqipërisë dhe të dekretuar nga Presidenti i Republikës, rikthehen në terren rreth 700 shtetas të arrestuar gjatë operacioneve të sukseshme policore “Tempulli” dhe “Sundimi i Ligjit” – pothuaj treçereku i shiptarëve të thjeshtë i konsideronte si të suksesshme këto dy operacione në sondazhin e fundit që zhvillova për UNDP.

Dhe rikthimi në terren i të burgosurve të sipërpërmendur përbën një shqetësim për shqiptarët e thjeshtë. Kjo amnisti duhet të përbëjë shqetësim edhe për Policinë e Shtetit, e cila ka për detyrë të monitorojë në terren kontigjentin e prirur për vepra të tilla penale.

Së dyti, qeveria gjermane po diskuton për dëbimin e të gjithë emigrantëve pa pasaportë gjermane që kanë kryer vepra penale atje. Në qoftë se merret një vendim i tillë, një kontigjent jo i vogël krimi do të rikthehet në Shqipëri. Dhe ky duhet të përbëjë një shqetësim të ri për Policinë e Shtetit.

Së treti (por jo më së pakti), qeveria shqiptare ka parashikuar se do të futen këtu këtë vit mbi 14 milionë shtetas me pasaporta të huaja – mbi 40% më shumë se vjet. Ndëkohë nga analiza që bëra me specialistin IT të sondazheve të mija, më rezultoi një rritje 64% e përmendjeve të fjalëve kyç për turizmin e Shqipërisë në të gjithë internetin botëror. Edhe sikur turizmi të rritet këtë sezon 50% krahasuar me vjet (e jo 64%), do të jetë një Cunam i vërtetë për Policinë e Rendit dhe Policinë Rrugore. (Shënim: Nga një analizë e numrit të automjeteve aktive me targa shqiptare dhe atyre që futen me targa të huaja, më ka rezultuar se do të kemi mesatarisht çdo ditë rreth 1 milion mjete në qarkullim këtë verë – më shumë gjatë fundjavave).

Në pritje të dallgëve të mësipërme, qeveria duhet të mendojë për shtesë emergjente fondesh për Policinë e Shtetit, si për aparatura teknologjike, ashtu edhe për pagesa jashtë orarit për policët e thjeshtë të mbingarkuar në terren. Në tremujorin e parë, Shqipëria iu afrua Bashkimit Europian, për sa i përket indeksit të vdekshmërisë nga krimet dhe aksidentet rrugore. Është mirë që mos t’i largohet atij në tremujorët pasardhës…

S.G/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    A po jep rezultate lufta e SPAK ndaj grupeve kriminale?



×

Lajmi i fundit

Analiza: A mund ta zgjidhë FMN-ja krizën e borxhit të vendeve të varfra?

Analiza: A mund ta zgjidhë FMN-ja krizën e borxhit të vendeve të varfra?