Skuadrat shqiptare të cilat marrin pjesë në eleminatoret e Europa League kanë marë rezultate negative në raundet e para.
Sikundër pritej Kukësi ka humbur pa shpresa në ndeshjen e parë eliminatore të Europa League pasi është mposhtur me shifrat 3-0 nga Debrecen. Në Hungari skuadra e drejtuar nga Ernest Gjoka e nisi mjaft mirë takimin, madje duke iu afruar shumë pranë golit pasi në një rast goditi edhe shtyllën.
Gjithsesi në pjesën e dytë ishte një ndeshje komplet tjetër, pasi Debrecen thuajse dominoi totalisht. Hungarezët gjetën golin e parë në minutën e 54 me futbollistin Garba, I cili në të njëjtën kohë zhbllokoi edhe rezultatin. Pas disa momenteve me lojë të barabartë, deri në përfundim të takimit Debreceni realizoi edhe dy herë të tjera, me Varga-n që realizoi ‘dopietë’.
Në fund ajo që vlen është një humbje e thellë e cila e bën thuajse të pamundur misionin përmbysje në ndeshjen e kthimit që luhet një javë më pas në ‘Elbasan Arena’.
Ndërkohë po me të njëjtin rezultat, 3-0, është mposhtur edhe Teuta në ndeshjen e parë eliminatore të ‘Europa League’. ‘Djemtë e detit’ kanë kapitulluar në Letoni ndaj Ventspils, që rrugën e rrjetës e gjëtën që në minutën e 5 me Sergiychuk. Ndërkohë në pjesën e dytë skuadra e drejtuar nga Bledi Shkëmbi u ndëshkua edhe dy herë të tjera nga Uilimbasevs dhe Aiyegun.
E vetmja skuadër shqiptare që ka befasuar për mirë është Laçi, që në ndeshjen e parë të luajtur në Kurbin kanë barazuar 1-1 ndaj një kundërshtari të vështirë si Hapoel Beer-Sheva. Madje të besuarit e Starovës kaluan të parët në avantazh që në minutën e 3 me sulmuesin e afruari rishtazi, ndërsa miqtë nga Izraeli realizuan në pjesën e dytë me futbollistin Levi.