Ekskluzive/ Skandali me diplomat false, dy ish-rektorët e Wisdom tregojnë si zbuluan skenën! Përpali: U dorëhoqa kur i pashë me firmën time

Lush Përpali, ishte rektor në “Wisdom” prej vitit 2017 kur Kolegji Universitar u hap për herë të parë në Tiranë. Por 6 vjet më pas, në vjeshtë të vitit 2023, zbuloi disa diploma të parregullta, me firmën e tij të falsifikuar dhe pa vulën e  kryesekretarit të kolegjit, siç vetë ai kishte urdhër të ndodhte në çdo dokument: me 2 firma.

Për Report Tv, ish-rektori Përpali i vetëlarguar nga Wisdom në janar të 2024-ës pasi zbuloi skandalin e diplomave false, vë në dispozicion edhe këtë certifikatë aftësish, master edukimi special për arsimin parauniversitar, program që as nuk ekziston në Wisdom. Firma,- thotë Përpali, nuk është autentike. Ish-rektori zbulon se edhe pasuesi i tij që emëruan drejtuesit e Wisdom, Bajram Hysa, u largua nga detyra në qershor të këtij viti (2024), pasi edhe ai, zbuloi një tjetër skandal. 

Report Tv kontaktoi edhe me ish-rektorin Bajram Hysa, i cili zbulon se Wisdom në Tiranë kishte lidhur një marrëveshje fiktive me një institucion në Itali të sajuar nga vetë pronarët e kolegjit universitar. Italianë të mashtruar – thotë Hysa – të cilët kishin marrë diploma me lekë, erdhën te ambasada italiane në Tiranë për të noterizuar këto certifikata. Dhe pikërisht këtu fillon të dalë në pah, mashtrimi: Marrëveshja mes 2 universiteteve as që nuk ekzistonte!

Për të proceduar, Ambasada i kërkoi informacion Ministrisë së Arsimit nëse diplomat e sjella nga italianët njiheshin në Shqipëri. Ndoshta e panjohur me këtë situatë, ministria iu drejtua Kolegjit universitar Wisdom në pranverë të këtij viti kur rektor ishte Bajram Hysa. Ish-rektori – tregon për Report Tv se – pikërisht në këtë moment zbuloi që certifikatat e italianëve mbanin firmën e paraardhësit të tij të dorëhequr Lush Përpali dhe njoftoi ministrinë se gjithçka është false.

Ministria e Arsimit nuk bëri të qartë asnjë detaj, por zyrtarisht vetëm dy ditë më parë tha se kreu kontroll në muajin korrik te Wisdom, dhe nga shkeljet që zbuloi, pa i bërë ato publike, nuk e certifikoi kolegjin për këtë vit akademik. Ky kontroll, nga sa ish-rektorët tregojnë, duket të jetë bërë vetëm pas zbulimeve të tyre.

Dy ish-rektorët, Lush Përpali dhe Bajram Hysa, nisën betejën që çështja të shkonte në dyert e drejtësisë shqiptare, me kallëzim në polici i referuar edhe në prokurorinë e Tiranës, pavarësisht se organi i akuzës pyetur nga Report Tv, thotë se nuk ka hetime të hapura.

Pasi Bajram Hysa kishte njoftuar ministrinë, iu drejtua Policisë së Tiranës me një kallëzim, i cili u referua në prokurori. Sipas Hysës, në 1 korrik 2024, bashkë me Përpalin janë thirrur në Prokurorinë e Tiranës për të dhënë shpjegime për çështjen nga prokurorja Antoneta Sevdari. Ndërkohë, Lush Përpali thotë se më 15 korrik i është drejtuar sërish prokurorisë me kallëzim, kjo e konfirmuar nga mandati i pagesës në postë dhe gjurmimi i dorëzimit të tij përmes aplikacionit të postës.

2 administratorët e Universitetit Wisdom u arrestuan gjatë një operacioni të Guardia di Finanza në Itali, si “arkitektët” e një skeme mashtrimi me diploma false bashkë me 7 të tjerë. Aktivitet i paligjshëm, që siç Report Tv po zbulon, ka depërtuar edhe në Shqipëri.

Në një nga përgjimet e autoriteteve italiane, del se presidentja e bordit të akreditimit të universiteteve, Shqiponja Telhaj është korruptuar nga çifti italian i bashkëshortëve të Wisdom me një çantë Louis Vuitton 1200 euro.

M.Q./E.B/Shqiptarja.com

TAG:
• lush përpali
• kolegji universitar wisdom
• bajram hysa
• ministria e arsimit