Ekspertë të huaj në Tiranë për praktikat më të mira për parandalimin e korrupsionit

TIRANË, 27 Qershor /ATSH/- Pesëdhjetepesë zyrtarë të lartë të specializuar në luftën kundër korrupsionit dhe përfaqësues të njohur të shoqërisë civile nga Vendet pjesëmarrëse të OSBE-së nga Evropa Lindore dhe Juglindore, Kaukazi Jugor dhe Azia Qendrore u mblodhën në një seminar dyditor rajonal ekspertësh rreth parandalimit të korrupsionit.
Seminari, i cili përfundoi sot punimet në Tiranë,  i bashkëorganizuar nga Zyra e Koordinatorit të OSBE-së për Veprimtari Ekonomike dhe Mjedisore, Prezenca e OSBE-së në Shqipëri dhe organizata ndërkombëtare partnere, shërbeu si një platformë për të identifikuar tendencat dhe sfidat për vënien në zbatim të masave parandaluese të efektshme në luftë kundër korrupsionit, si dhe për të diskutuar praktikat më të suksesshme në këtë drejtim.
Pjesëmarrësit folën në lidhje me efektivitetin e qasjes së "qeverisë së plotë" në luftë kundër korrupsionit. Ata e vunë theksin tek disponueshmëria dhe transparenca e të dhënave qeveritare në lidhje me shpenzimet publike, qasja në shërbime publike, si dhe lehtësimi i barrës rregulluese, duke thënë se këto janë masa të efektshme shtesë për nxitjen e një kulture integriteti. Ata vunë në dukje gjithashtu rolin kyç që luan shoqëria civile për parandalimin e korrupsionit, kryesisht përmes përgatitjes dhe realizimit të sondazheve rreth perceptimit të korrupsionit, si dhe përmes monitorimit të përpjekjeve të qeverive në luftë kundër korrupsionit.
"Parandalimi është një element kyç i luftës kundër korrupsionit dhe si i tillë duhet shoqëruar prej një sërë veprimesh të mirëpërkufizuara, të mirëstrukturuara dhe të përshtatura me nevojat reale," tha Bledar Çuçi, Ministri i Shtetit për Çështjet Vendore dhe Koordinatori Kombëtar për luftën kundër korrupsionit në Shqipëri. "Parandalimi përmes arsimimit është një prej mesazheve kryesore të fushatës mbarëkombëtare të ndërgjegjësimit në luftë kundër korrupsionit".
Ambasadori Florian Raunig, Kryetari i Prezencës së OSBE-së në Shqipëri, tha: "Lipsen urgjentisht masa konkrete e të bashkërenduara për të luftuar fenomenin e korrupsionit. Qytetarët duhet ta ndjejnë se ky problem po luftohet seriozisht. Ata gëzojnë të drejtën për të përfituar shërbime të efektshme, të besueshme dhe funksionale, duke përfshirë këtu shërbime shëndetësore dhe një shkollim cilësor".
Veprimtaria u zhvillua në kuadrin e mbështetjes së OSBE-së për Vendet pjesëmarrëse me synim realizimin e angazhimeve të tyre të ndërmarra në Deklaratën Ministeriale të Dublinit në vitin 2012 për Nxitjen e Mirëqeverisjes dhe Luftën kundër Korrupsionit, Pastrimit të Parave dhe Financimit të Terrorizmit.
Seminari rajonal i ekspertëve u bashkëorganizua nga OSBE-ja në kuadrin e Rrjetit Antikorrupsion për Evropën Lindore dhe Azinë Qendrore të Organizatës për Zhvillim dhe Bashkëpunim Ekonomik (OECD), në bashkëpunim me Programin për Zhvillim të Kombeve të Bashkuara (UNDP) dhe Zyrën e Kombeve të Bashkuara kundër Drogave dhe Krimit (UNODC)./a.gegvataj/

TAG:
• OSBE