ELBASAN, 5 Qershor /ATSH-Miranda Sadiku /.-Sektori kundër krimit ekonomik e financiar në Elbasan, ka finalizuar operacionin e koduar
" I Pandreqshmi" duke bërë të mundur arrestimin e sekserit të universitetit " Aleksandër Xhuvani" si edhe shpallur në kërkim një tjetër person. Burime të Policisë bëjnë të ditur se " këtë të premte  oficerë të krimit ekonomik në bashkëpunim edhe me  Sektorin për Korrupsionin në Drejtorinë e Policisë së Shtetit,  kanë bërë ekzekutimin e urdhërit të ndalimit të lëshuar nga Gjykata e  Rrethit Gjyqësor  Elbasan e cila ka caktuar masën e sigurisë "Arrest me burg" për shtetasin Oltion  Toçi,  34 vjeç,  banues   në  Elbasan. 34 vjeçari në rolin e sekserit për një  periudhë kohe 6 mujore ,   në  bashkëpunim  me   shtetasin B.K  vjeç 35,   banues në  Elbasan,   i   shpallur  në   kërkim,   ka ushtruar ndikim të paligjshëm kundrejt  përfitimit tek stafi Akademik  në Universitetin "Aleksandër Xhuvani" në  Elbasan, gjatë zhvillimit të provimeve të  studenteve, të cilët kërkonin një  notë kaluese ose një  notë  më  të  mirë .
Në  këmbim të  këtyre  favoreve që kërkonin studentët Oltion Toçi u kërkonte atyre një pagesë që varjonte  nga 13.000 deri në 15.000 lekë të reja për çdo provim. Mësohet se këtë skemë korruptive 34 vjeçari e kishte të mirëorganizuar dhe e kryente në bashëpunim edhe me persona të tjerë, që sipas Policisë janë pedagogë të universitetit, por që për arsye hetime nuk mund të bëjnë të ditur asnjë emër deri në zbardhjen e plotë të rrethanave të ngjarjes.  Policia po vijon hetimet për identifikimin e personave të tjerë të implikuar në këtë aktivitet kriminal.Materialet i kanë kaluar Prokurorisë së Rrethit Gjyqësor Elbasan pasi 34 vjeçari akuzohet dhe do të hetohet për veprat penale "Korrupsioni  pasiv  i  personave që  ushtrojnë  funksione  publike" si  dhe  "Ushtrimi  i ndikimit  të  paligjshëm ndaj   personave  që  ushtrojnë  funksione   publike,  e  kryer  në  bashkëpunim".
 
Operacioni " Ciklisti", arrestohet 41 vjeçari tregëtonte mallra kontrabandë
Transportonte dhe tregëtonte mallra kontrabandë, Policia ndalon 41 vjeçarin Altin Leka nga Elbasani. Ngjarja ka ndodhur të premten në mesditë, ku falë një operacioni të koduar " Ciklisti", Policia ka vënë në pranga 41 vjeçarin, i cili akuzohet për veprën penale " tragëtim i mallrave kontrabandë".
Policia sqaron se " gjatë një kontrolli të ushtruar në dyqanin  e   tij  dhe  më  pas  në banesën e  tij  u gjet  dhe u  sekuestrua  një  sasi prej  200 kilogram  kafe e pa amblazhuar me mbishkrimin "Medission kafe", e ardhur  nga Italia.  Nga  veprimet  e  para   hetimore  rezultoi  se  ky  shtetas,  nuk  dispononte  asnjë faturë tatimore dhe  dyshohet se  ky mall është futur kontrabandë në  vëndin  tonë.  Gjithashtu  në dyqanin  që  tregtonte dhe reklamonte kutitë  e kafese,  u  konstatua  se  ky  shtetas  e  ushtronte këtë aktivitet pa liçencë.