Gati për votime! Materialet zgjedhore u shpërndanë në të gjithë vendin me përjashtim të disa zonave në Shkodër

Rreth orës 23:45 minuta është hapur duke prerë zinxhirin me gur fresibël dhe dera e shkollës "Oso Kuka" e cila është përcaktuar si vendvotim dhe që do të vendosen materialet zgjedhore për nesër.

Në orën 23:15 minuta në Shkodër është hapur edhe dera e gjimnazit "Kolë Idromeno" që ishte kyçur me urdhër të Voltana Ademit. Zinxhiri i derës është prerë me gur fresibël, ndërsa Report Tv sjell pamjet e momentit kur është hapur dera për të futur materialet zgjedhore në mënyrë që nesër në këtë qendër votimit të jetë gjithcka gati.

Me përjashtim të qarkut të Shkodrës, në gjitha qarqet nuk është shënuar asnjë incident në shpërndarjen e materialeve zgjedhore dhe marrjen e tyre në ruajtje nga policia. Në kryeqendrën e veriut kryebashkiakja Voltana Ademi u vendosi kyçin objekteve, shkollave dhe qendrave shëndetësore. Një pjesë e tyre u hapën, ndërsa pjesa tjetër jo, duke detyruar komisionerët që të zhvendosin qendrat e votimit në godina të tjera shtetërore të administruara nga pushteti qendror. Sipas KQZ-së, deri në orën 19:00, 50%  e qendrave të votimit ishin ende të  mbyllura. Prej orës 19:00 e në vijim po vijon zhvendosja e qendrave të votimit për të qenë gati për nesër.  

Në Dibër nuk është shënuar asnjë problem në marrjen në ruajtje të materialeve zgjedhore nga policia në të gjitha qendrat e votimit.

Edhe në qarkun e Durrësit policia ka marrë në ruajtje të gjitha materialet zgjedhore që janë shpërndarë në të gjitha qendrat e votimit. Nuk është shënuar asnjë incident.

Në Tiranë dhe Kamëz cdo gjë është gati për nesër në orën 07:00 të mëngjesit për të votuar, pasi në të gjitha qendrat e votimit janë dërguar materialet zgjedhore. Nuk është shënuar asnjë incident.

Në të gjithë qarkun e Kukësit materialet janë shpërndarë pa probleme në të gjitha Qendrat e Votimit

Edhe në qarkun e Gjirokastrës janë shpërndarë të gjitha materialet në qendrat e votimit pa asnjë problem. Report Tv mëson se cdo gjë ka shkuar normalisht pa asnjë incident.

Policia e Qarkut Fier mori në ruajtje të gjitha qendrat e votimit. Edhe në këtë qark nuk është shënuar asnjë incident, pasi materialet zgjedhore janë shpërndarë normalisht.

Në qarkun e Korçës ka përfunduar procesi i shpërndarjes së materialeve zgjedhore në qendrat e votimit të të gjitha bashkive Korçë, Devoll, Maliq, Pogradec, Kolonjë, Pustec. Në të gjitha bashkitë procesi i shpërndarjes ka përfunduar pa incidente.

Policia e Qarkut Lezhë mori në ruajtje të gjitha qendrat e votimit në bashkitë Lezhë, Mirditë dhe Kurbin. Edhe në këtë qark nuk u shënua asnjë problem me shpërndarjen e materialeve zgjedhore.

Baza materiale zgjedhore është shpërndarë nga KZAZ e Vlorës, Selenicës, Himarës, Delvinës, Sarandës, Konispolit dhe Finiqit. Edhe në qarkun e Vlorës nuk është shënuar asnjë incident.

Policia e Qarkut Elbasan mori në ruajtje të gjitha qendrat e votimit në të gjitha KZAZ-të, nuk raportohet për asnjë problem. Në Librazhd, Gramsh, Cërrik, Peqin dhe Prrenjas nuk është shënuar asnjë incident.

Policia e Qarkut te Beratit njofton zyrtarisht se uniformat blu kanë marrë në ruajtje të gjitha qendrat e votimit. Në orën 22:00 ka përfunduar procesi i shpërndarjes së materialeve zgjedhore në të pesta KZAZ-të e qarkut. Nuk është shënuar asnjë incident.

Pesë qendra votimi në Shkodër janë zhvendosur. Tre që ishin parashikuar në shkollën 9-vjeçare 'Ndre Mjeda' janë spostuar te godina e zyrës së punës. Përkatësisht qendrat e votimit 291, 292 dhe 293 nga shkolla, materialet janë dërguar në ambientet e zyrës së punës. Spostohen edhe 2 qendra tjera të cilat ishin të pozicionuara në godinën e ujësjellësit spostohen në godinën e postës. Ndërsa edhe në Bushat, KZAZ-ja e Vaut të Dejës që u dogj nga militantët e PD-së u spostua në një subjekt privat, lokal dasmash.

Pasditen e sotme në Shkodër edhe shkollat 9-vjeçare “Pashko Vasa” dhe "Ali Laçej" janë hapur me forcë, teksa zinxhirët janë këputur me darë. Report Tv sjell pamjet nga momenti kur është hapur porta e jashtme e shkollës për të futur materialet zgjedhore.  

Shqiptarja.com mëson se procesi i shpërndarjes së materialeve zgjedhore nëpër qendrat e votimit në Lezhë ka përfunduar me sukses.

Në këtë rreth nuk janë shënuar incidente gjatë shpërndarjes se materialeve zgjedhore. Ndërkohë që në disa qytete të tjera shpërndarja është drejt fundit.

Vëzhguesit e OSBE-së po ndjekin procesin e futjes së materialeve zgjedhore, por edhe shkollat e kyçura pas urdhrit të Voltana Ademit.
 

Kryebashkiakja e Shkodrës Voltana Ademi ka reaguar pas hapjes së disa disa ambienteve të shkollave nga anëtarët e KZAZ-ve për të futur materialet në qendrat e votimeve. Ademi që u vendosi kyçin këtyre institucioneve, thotë se pas veprimeve te fundit të hapjes së këtyre institucioneve me 'thyerje e dëmtim' po njoftohen institucionet vendase dhe të huaja, si OSBE-ODIHR.

'E indinjuar për mosrespektimin e urdhrit tim në lidhje me ambientet publike në pronësi të Bashkisë Shkodër nga KQZ-ja, urdhër i bazuar në Kushtetutë, Dekretin e Presidentit të Republikës, Ligjin 139/2015 “Për vetëqeverisjen vendore”. Në cilësinë e kryetares së Bashkisë së Shkodrës, denoncoj publikisht ndërhyrjen e jashtëligjshme në institucionet në pronësi të qeverisjes vendore nga ana e Policisë së Shtetit. Këto veprime të pastra diktatorialo-politike, për hapjen e dhunshme me thyerje e dëmtim të institucioneve publike, po dhunojnë haptas dhe ditën për diell vlerat demokratike.

Gjithashtu janë duke njollosur të drejtën e votës së lirë, të pa manipuluar, të barabartë apo të blerë nga mafia. Ne po monitorojmë dhe dokumentojmë hap pas hapi të gjitha këto akte të pakuptueshme ndaj pronave të qeverisjes vendore dhe po informojmë institucionet vendase dhe të huaja, si OSBE-ODIHR. Ne kemi qenë, jemi dhe do të vazhdojmë të punojmë e lufftojmë për një Shqipëri brenda familjes Europiane, e cila dinjitetin dhe lirinë e personit njerëzor i vlerëson shtylla të zhvillimit' shkruan Voltana Ademi.

Ish-deputeti demokrat Bardh Spahia që ndodhet në masën e sigurisë arrest shtëpie, pas sulmit mbi KZAZ-në në shkollën "Shejnaze Juka" denoncon përmes pamjeve në faqen e tij në Facebook se 'banditët e PS-së po hapin me dhunë institucionet që kryebashkiakja në fakt i ka kyçur'.  

"Banditizmi, edhe si sjellje e shtetit bandit. Ja se si shperthehet qendra shendetesore ne zonen e Qafe Hardhise ne Shkoder nga individe te PS! Kete stil njohin, se per ta shteti eshte pushtet per t'u sjelle sic thote partia e jo ligjet e rregullat! Kur institucionet dhunohen ne kete menyre, kete e quajne standart. Cuditerisht policia nuk ben asnje veprim, hesht dhe i mbron krahet ketij "standardi". #BanditShtet" shkruan ai.
 

Kur na ndajnë edhe pak orë nga nisja e procesit të votimit për zgjedhjet lokale në të gjithë Shqipërinë, KQZ ka dalë në një deklaratë për mediat duke bërë  thirrje për mirëkuptim nga qytetarët për ndryshimet e detyruara që janë bërë në disa bashki.

Sipas KQZ në bashkinë e Shkodrës rreth 50% e qendrave të votimit janë ende të pahapura. Kujtojmë se këto qendra mbahen të mbyllura e urdhër të kryetares demokrate së bashkisë së Shkodrës, Voltana Ademi. Aksioni i saj për të mbajtur mbyllur qendrat e votimit vjen në kuadër të thirrjeve të opozitës për të penguar procesin zgjedhor të 30 qershorit.

KQZ  ka bërë thirrje Voltana Ademit që të bashkëpunojë në mënyrë që të gjithë qendra e votimit të jenë të hapura për ditën  e nesërme. KQZ me pas i kujton Ademit se bllokimi i qendrave të votimi është një vepër penale dhe ndëshkohet me ligj.

"Sot, sikundër Kodi Zgjedhor përcakton, të 90 KZAZ-të po  shpërndajnë materialet zgjedhore drejt  5417 Qendrave të Votimit ,në të gjithë Shqipërinë. Procesi i shpërndarjes së materialeve zgjedhore ka përfunduar nga 53 Komisione të Zonave të Administrimit Zgjedhore, ndërkohë të gjithë KZAZ-të e tjera janë drejt përfundimit të këtij procesi. Përjashtim bën KZAZ nr. 6, bashkia Vau i Dejës, ku për shkaqe tashmë të njohura, materialet zgjedhore u ridërguan në orët e para të ditës së sotme, ëka diktoi vonesën në nisjen e procesit të shpërndarjes së bazës materiale për 53 Qendrat e Votimit që ka kjo KZAZ. Ndërkohë, në Qarkun Shkodër, rezulton që rreth 50 % e qendrave të votimit vazhdojnë ende të mbahen të mbyllura nga autoritet vendore. Komisioni Qendror i Zgjedhjeve i bën thirrje kryetares së Bashkisë Shkodër të bashkëpunojë në respekt të ligjit. Në baze të neneve 248, 325 të Kodit Penal këto veprime konsiderohen vepër penale; shpërdorim detyre dhe pengim i subjeketeve zgjedhore.Sikundër sot keni ndjekur mbledhjet e KQZ-së, me vendim është autorizuar ndryshimi disa vendndodhjeve të qendrave të votimit. Ky ndryshim, pavarësisht se jo për shkak të forcave madhore, ashtu sikundër Kodi Zgjedhor përcakton, ishte i detyrueshëm për të garatuar që ëdo qendër votimi, ditën e nesërme, të jetë e hapur për zgjedhësit shqiptarë. Të gjithë KZAZ-të që administrojnë procesin zgjedhor në zonat ku u bënë ndryshime të qendrave të votimit, do të afishojnë listat e zgjedhësve në vendndodhjet e reja, të caktuara me vendim të KQZ-së. Ndaj, KQZ kërkon mirëkuptimin e zgjedhësve të këtyre qendrave të votimit për këtë veprim të detyruar, si edhe kërkon që të informohen dhe të kontrollojnë faqen zyrtare të KQZ-së, për të qenë të mirëorientuar ditën e nesërme për t’iu drejtuar qendrave të votimit."  deklaroi KQZ.

Në shkollën 9-vjeçare "Edith Durham" në Shkodër që është përcaktuar si një nga vendvotimet për nesër janë këputur zinxhirët me darë për të futur brenda materialet zgjedhore, pasi ishte kyçur pas urdhrit të kryebashkiakes Voltana Ademi.

Shkolla 'Jordan Misja' në Shkodër ku janë përcaktuar dy qendra votimi në varësi të KZAZ-së nr. 4 është kyçur pas urdhrit të kryebashkiakes Voltana Ademi. Anëtarët e komisionit bashkë me personat e tjerë kanë shkuar për të çuar materialet zgjedhore, por dera ka qenë e mbyllur.

Komisioni i KZAZ-së përballë kësaj situate i kërkoi ndihmë policisë. Efektivi i kërkoi që të hapte derën rojes, por ai shpreh se 'nuk e di, e ka mbyllur tjetërkush, jo unë'. Kryebashkiakja  Voltana Ademi nuk ka lejuar që shkollat  të vihen në dispozicion si qendra votimit.

Me një urdhër, të cilin e ka ngjitur në dyert e jashtme të këtyre shkollave shkruhet "Ndërtesat që janë në pronësi dhe administrim të Bashkisë Shkodër janë në shërbim sipas funksionit që ato kanë të përcaktuar në dokumentin e pronësisë. Askush nuk është i lejuar për t'i përdorur ato për qëllime të tjera pa autorizimin e Bashkisë Shkodër.

Sipas përcaktimit ligjor ky objekt është i paprekshëm pa lejen e institucionit të Bashkisë", shkruhet në dokument.

Në qytetin e Elbasanit janë shpërndarë pa asnjë incident të shënuar nëpër qendrat e votimit materialet zgjedhore.

Në bashkinë e Elbasanit materialet zgjedhore janë shpërndarë në 235 qendra votimi. Po kështu qendrat e votimit janë mbushur me materialet zgjedhore në Përrenjas, Librazhd, Cërrik, Peqin, Gramsh dhe Belsh.

Në të gjitha këto bashki procesi i shpërndarjes ka qenë i qetë dhe pa incidente.

Edhe në Shkodër vijon normalisht shpërndarja e materialeve zgjedhore. Në KZAZ-në nr. 4 që ndodhet në palestrën e shkollës 9-vjeçare nuk është zbatuar urdhri i kryebashkiakes Voltana Ademi, që i kyçi, pasi roja ka hapur derën e shkollës pyjore për vendosjen e materialeve zgjedhore. Nuk është shënuar asnjë incident.

Shqiptarja.com mëson se ka përfunduar shpërndarja e materialeve zgjedhore në pjesën më të madhe në bashkinë Selenicë, në Brataj, Kote, Armen, Vllahine, etj. Nuk janë shënuar incidente. Edhe në KZAZ-në me numër 62 Bashkia Ura Vajgurore, vijon procesi i shpërndarjes së materialeve zgjedhore për zgjedhjet e 30 Qershorit.

Shpërndahen materialet zgjedhore edhe në KZAZ-të e Gjirokastrës dhe Divjakës, ndërsa nuk raportohet për probleme në qendrat e votimit. Kutitë po shpërndahen sipas planit.

Foto ilustruese

Materialet zgjedhore të KZAZ nr 86 ne Himarë janë shpërndarë në 16 qendra votimi, përfshirë ato të Kuçit, Vranishtit, Nivicës dhe Shën Vasilit, ndërsa në Selenicë pritet të mbërrijë policia që të bëhet shoqërimi i materialeve.Deri në mesditë procesi i shpërndarjes së materialeve ka qenë i qetë dhe të gjithë qendrat e votimit kanë qenë të hapura.

Shpërndarja ka nisur edhe në KZAZ nr 83 në Vlorë.

Materialet zgjedhore në Sarandë, dhe Berat janë shpërndarë nga KZAZ nëpër qendra votimi pasdreke. Shpërndarja është kryer pa vonesa apo incidente ndërkohë që në gatishmëri kanë qenë edhe efektivët e policisë për të garantuar një proces të rregullt dhe të qetë.

Ka nisur shpërndarja e materialeve zgjedhore edhe në kryeqytet. Të pranishëm janë edhe përfaqësues të OSBE-ODIHR . Gazetari i Report Tv, Elis Memelli ka ndjekur nga afër dorëzimin nga KZAZ-ja të materialeve zgjedhore në qendrën e votimit në shkollën "Vasil Shanto", e cila do të shërbejë edhe si qendër numërimi në përfundim të votimit. 

 Shpërndarja e bazës së materialeve zgjedhore nëpër qendrat e votimit në qarkun e Korçës ka qenë i qetë. Ato janë shpërndarë në 6 QV në Kolonjë, ndërsa procesi po vijon normalisht edhe në komunën Miras në Devoll.

Edhe në Kurbin KZAZ kanë bërë shpërndarjen e bazës materialeve të nevojshme për procesin zgjedhor të ditës së nesërme nëpër qendra votimi.

KZAZ 54 dhe 55 në Lushnje kanë nisur shpërndarjen materialeve zgjedhore në Lushje. Procesi ka qenë i qetë ndërsa forcat e policisë janë kujdesur për sigurinë e tij.

Materialet zgjedhore në Kukës janë shpërndarë ditën e sotme përmes mjeteve të transportit të ushtrisë në shoqërinë e masave të sigurisë. Pritet që shpërndarja e materialeve të nisë edhe në Has e Tropojë.

Kryebashkiakja  Voltana Ademi nuk ka lejuar që shkollat  të vihen në dispozicion si qendra votimit. Me një urdhër, të cilin e ka ngjitur në dyert e jashtme të këtyre shkollave shkruhet "Ndërtesat që janë në pronësi dhe administrim të Bashkisë Shkodër janë në shërbim sipas funksionit që ato kanë të përcaktuar në dokumentin e pronësisë. Askush nuk është i lejuar për t'i përdorur ato për qëllime të tjera pa autorizimin e Bashkisë Shkodër. Sipas përcaktimit ligjor ky objekt është i paprekshëm pa lejen e institucionit të Bashkisë", shkruhet në dokument. Report Tv sjell pamje nga shkolla "Pashko Vasa" dhe shkolla teknike pyjore, teksa shihet që ato janë të mbyllura. Por ajo që vihet re është se Ademi i është referuar dekretit të dytë të Metës, atij të datës 10 qershor dhe jo këtij të fundit.

Vendimi i Voltana Ademit

Shkodra është qyteti i radhës në të cilin ka nisur shpërndarja e  materialeve zgjedhore në disa prej qendrave të votimit. Disa shkolla vijojnë rezistencë, ndonëse ka pasur një urdhëresë nga Ministria e Arsimit për të vënë në dispozicion ambientet e tyre. Siç raporton gazetari nga Shkodra, Ergys Kavaja, shpërndarja do të bëhet fillimisht pikërisht në ato shkolla që janë të hapura.

Ka nisur shpërndarja e materialeve zgjedhore në QV në Fier. Shpërndarja ka përfunduar pa probleme në KZAZ nr.58.  Sipas kreut të kësaj  Niko Neco procesi ka qenë i qetë dhe deri në orët e pasdites ai mund të përfundojë në të gjithë rrethin.

"Shpërndarja e materialeve zgjedhore ka filluar që në orën 10:00. nuk ka pasur asnjë problematikë. Presim të vijnë edhe tre njësi të tjera dhe shpresojmë se deri pasdite do kemi përfunduar shpërndarjen e bazës materiale në të gjithë Fierin", tha Neco.

Ka nisur shpërndarja e materialeve zgjedhore në qendrat e votimit në qytetin e Bashkinë e Elbasanit. Gazetari i Report Tv, Aldo Kozarja raporton se në terren janë angazhuar 248 efektivë. Report Tv sjell video nga momenti teksa bëhet shpërndarja e materialeve zgjedhore në Pallatin e Sportit të këtij qyteti.