Meta intervistë për median britanike: Të rinjtë shqiptarë po ikin prej qeverisjes autokratike të Ramës

Kryetari i Partisë së Lirisë, Ilir Meta ka dhënë një intervistë për radion britanike LBC në lidhje me problemin e emigrantëve shqiptarë në Britaninë e Madhe. Ilir Meta ka gjetur si shkak për emigrimin e të rinjve, qeverisjen sipas tij, autokratike të Edi Ramës. Në fjalën e tij Meta tha se gjendja e vështirë ekonomike po shtyn të rinjtë shqiptar që të ndërmarrin çdo rrezik dhe të kalojnë La Mansh me gomone, sepse qeveria shqiptare është aktori kryesor përgjegjës për vrasjen e shpresave të tyre për të ndërtuar të ardhmen në vend.

Intervista e plotë e kryetarit të Partisë së Lirisë, Ilir Meta për radion britanike LBC

Meta: Ikja e shqiptarëve për shkak të mungesës së mundësive dhe shtetit të së drejtës

Përse po ikin shqiptarët? 

Meta: Fatkeqësisht kjo po ndodh për shkak të mungesës së mundësive që u ofron qeveria autokratike e kryeministrit Rama, i cili është në detyrë prej 10 vitesh. Dhe gjithashtu prej mungesës së shtetit të së drejtës në vend.  Janë këto, dy arsyet kryesore që kanë vrarë shpresat e të rinjve shqiptarë dhe po i detyrojnë ata të largohen nga vendi.

Por, pse duhet të kërkojnë azil në Mbretërinë e Bashkuar? E kuptoj që ka njerëz që duan të jetojnë në Mbretërinë e Bashkuar, por pse të kërkojnë azil?

Meta: Sepse për shumicën prej tyre, standardi i jetesës që kishin në vendin tonë ka ardhur duke u përkeqësuar.

Por Shqipëria nuk është në luftë, nuk është në gjendje lufte, janë kushtet ekonomike që padyshim janë shumë të vështira. Gjermania për shembull deklaron se Shqipëria është një vend i sigurt.

Po ke të drejtë, por gjendja ekonomike, gjendja sociale, përjashtimi social është në nivele të tilla, sa janë gati të marrin çdo rrezik dhe të kalojnë La Mansh me gomone, sepse qeveria shqiptare është aktori kryesor përgjegjës për vrasjen e shpresave të tyre për të ndërtuar të ardhmen në vend. Nëse krahasojmë numrin e shqiptarëve që kërkojnë azil në Britaninë e Madhe, me të rinjtë nga Kosova, Maqedonia e Veriut, Bosnja dhe Hercegovina, është aq i madh sa që nuk mund të krahasohen.

Meta: Kryeministri Rama të mos provokojë por të bashkëpunojë me autoritetet britanike, situata për shkak të qeverisë së  tij të korruptuar

Por a mendoni atëherë se autoritetet britanike duhet të pranojnë kërkesat për azil të të rinjve shqiptarë, nisur nga rrethanat që po përshkruani?

Mendoj se së pari është shumë e rëndësishme që kryeministri Rama të shmangë tonet provokuese me autoritetet britanike, sepse kjo situatë është rezultat i qeverisë së tij të dështuar dhe të korruptuar dhe së dyti, ai duhet të punojë dhe të bashkëpunojë me qeverinë dhe autoritetet e Mbretërisë së Bashkuar, por edhe me autoritetet franceze, dhe agjencitë ligjzbatuese europiane, sepse jemi thellësisht të shqetësuar për jetën e mijëra shqiptarëve, që janë ngujuar në fakt në pyjet e Francës, në pritje të ardhjes në Britani të Madhe.

Pse situata në Shqipëri duhet të nënkuptojë që Britania e Madhe duhet të marrë më shumë kërkesa për azil?

Ne mendojmë se autoritetet e Mbretërisë së Bashkuar duhet të punojnë me autoritetet shqiptare, në mënyrë konstruktive për të adresuar këtë fenomen. Dhe së dyti, fatkeqësisht ka shumë prej tyre që ndihen të përjashtuar dhe të persekutuar për arsye politike nga qeveria shqiptare. Ne nuk i inkurajojmë ata të largohen nga vendi. Ne i inkurajojmë ata të luftojnë këtu për të drejtat e tyre dhe të bëjnë gjithçka për të hequr qafe këtë qeveri të papërgjegjshme, në mënyra demokratike.

Meta: Autoritetet britanike të jenë fleksibël, një pjesë e të rinjve minorenë, viktima të rrjetit të trafikantëve dhe keqqeverisjes në Shqipëri

Por ka shqiptarë që kthehen në Shqipëri nga Britania e Madhe, nga Gjermania, nga Franca, nga e gjithë Evropa, kërkesat e të cilëve për azil kanë dështuar. A mendoni se qeveria britanike duhet të lejojë që ata shqiptarë që presin përpunimin e kërkesave për azil në Britani, a mendoni se duhet të lejohen të qëndrojnë e punojnë në Britani?

Meta: Do të doja që autoritetet e Mbretërisë së Bashkuar të tregojnë fleksibilitetin maksimal, sepse gjithashtu nuk duhet të harrojmë se shumë prej tyre janë nën 16 vjeç dhe është shumë e rëndësishme të tregohet fleksibilitet dhe maturi. Gjithashtu u bëjmë thirrje të gjithë të rinjve shqiptarë që të mos largohen nga vendi.

Gjithsesi, qeveria gjermane, franceze, spanjolle, a është në të drejtat e saj që t'i kthejë të gjithë ata shqiptarë që kanë dështuar kërkesat për azil?

Meta: Ne nuk mund t'i dënojmë autoritetet e huaja pse ato përpiqen të zbatojnë legjislacionin e tyre, por dëshirojmë të shohim trajtim të barabartë dhe pa diskriminime për të gjithë këta shqiptarë të pashpresë, që rrezikojnë jetën duke marrë gomonet për të kaluar La Mansh.

Por a mendoni se shqiptarët diskriminohen nga qeveria britanike?

Meta: Nga autoritetet britanike do të doja të bënin maksimumin, të tregonin maturi dhe të mos i përziejnë ata pak shqiptarë, që janë të interesuar të promovojnë këto rrjete trafikimi, për përfitimet e tyre kriminale, me shumicën e këtyre njerëzve, të cilët janë të ndershëm dhe që janë viktima të mungesës së shpresës në vendin e tyre dhe përpiqen të gjejnë të ardhme shpresëdhënëse duke rrezikuar jetën, edhe duke kaluar La Mansh me gomone.

Ish-Presidenti i Shqipërisë i bëri thirrje qeverisë së Mbretërisë së Bashkuar që të tregojë fleksibilitet dhe maturinë maksimale ndaj atyre që vijnë nga Shqipëria për të kërkuar azil në MB.

M.Q./Shqiptarja.com

TAG:
• debati per shqiptaret ne britani
• Ilir Meta
• emigracioni
• Partia e Lirise
• Britani e Madhe