Një 19-vjeçar është vënë në pranga në Kukës, pasi u kap teksa lëvizte me automjet, brenda së cilës kishte kanabis dhe shkop bejsbolli, ndërkohë që ishte me masë sigurie "Arrest në shtëpi" të caktuar nga GJKKO-ja.
Më pranga ka rënë Gerald Metallari, i cili u ndalua nga Policia Kukës teksa lëvizte me automjetin e tij tip “Benz”, së bashku me dy pasagjerë.
Nga kontrolli që uniformat blu i bënë mjetit, gjetën një sasi kanabisi dhe një shkop bejsbolli, që u sekuestruan si provë materiale.
Ndërsa, nga verifikimet e mëtejshme rezultoi se 19-vjeçari ishte me masë sigurie "Arrest në shtëpi", të caktuar nga Gjykata kundër Korrupsionit dhe Krimit të Organizuar, për veprat penale “Ndihma për kalim të paligjshëm të kufijve” dhe “Kalimi i paligjshëm i kufirit shtetëror”, të kryera në bashkëpunim, më shumë se një herë.
Në vijim të veprimeve procedurale për këtë rast i riu u arrestua në flagrancë si dhe u referuan materialet në Prokurori ku nisi procedimi në gjendje të lirë për shoqëruesit e tij S. C., 19 vjeç dhe F. SH., 18 vjeç, të tre banues në Kukës.
Materialet procedurale i kaluan Prokurorisë Kukës, për veprime të mëtejshme.