TIRANË- Indrit Aliu (Kolleshi) ka rënë në prangat e policisë së Tiranës pas denoncimit të një biznesmeni, i cili kuptoi se ishte mashtruar. Ai u prezantohej biznesmenëve si zyrtar i lartë duke u premtuar tenderë të ndryshëm në Ministrinë e Infrastrukturës, kryesisht në aktivitetin e minierave të ndërtimit, raporton gazetari i Report Tv, Sokol Dema.

39-vjeçari me origjinë nga Vlora dukej se ishte i ‘vjetër’ në zanatin e mashtrimit, ai ka qenë i dënuar për të njëjtën vepër penale në vitin 2011 me 10 vjet burg. Për të kapur ‘peshqit e mëdhenj’, ai kishte hapur një zyrë, të cilën e përdorte për të mashtruar investitorë të ndryshëm. Në rrjetën e tij binin shumë sipërmarrës, pasi hiqej sikur kishte njohje brenda ministrisë dhe kundrejt shumave të parave mund t’u jepte tenderat që ata kërkonin.

Historia e Indrit Aliut (Kolleshi) nisi që prej vitit 2008, ku emri dhe fytyra e tij doli kudo si i arratisuri me 3 milionë euro me vete, të cilat i kishte përvetësuar duke mashtruar. Ai mundi të mashtrojë edhe policinë e shtetit, aso kohe. Edhe atyre u kishte premtuar ndihma me vlera marramendëse, por që sigurisht nuk morën asgjë. 

Pas shpalljes në kërkim, në vitin 2010 ai u arrestua në Greqi dhe prej andej u ekstradua në vendin tonë. Ai u dënua me 10 vjet burg. 

Asokohe i dyshuari u arrestua në Greqi pas dhjetëra denoncimeve të bëra ndaj tij në Tiranë për mashtrim. Sipas dosjes, në 24 shtator 2008, ai ka regjistruar në QKR shoqërinë “Dejs&Partners Consulting”, ku ishte ortak i vetëm. Objekt i aktivitetit ishte “konsulenca juridike dhe fiskale për individët dhe shoqëritë tregtare, si dhe te gjitha aktivitetet që lidhen me fushën e ndërtimit”. Nën emrin e kësaj shoqërie, sipas prokurorisë, Indrit Aliu ka hartuar kontrata me shoqëri të ndryshme sipërmarrëse për kryerjen e punimeve të ndryshme ndërtimore nëpër Shqipëri, por, pasi merrte pagesa nga këto shoqëri në formën e sigurimit të kontratës, ai nuk i ka likuiduar ato për punimet e kryera.

Sipas Prokurorisë, për t’u dukur i besueshëm dhe se përfaqësonte një shoqëri serioze, Aliu ishte shfaqur në programe televizive, kishte sponsorizuar emisione, pretendonte se kishte njohje të shumta në institucionet shtetërore dhe se në zyrë mbante foto me figura të njohura publike, përfshirë drejtues të policisë së kohës dhe personazhe të lidhur me politikën.

 

Indrit Aliu me efektive te periudhes dhe foto me Liri Berishën

Rendit zhvillimet sipas orarit:
Ora 10:09
Mashtroi biznesmenë duke u premtuar tendera në miniera dhe ndërtim! Indrit Aliu kishte hapur dhe zyrë për të joshur viktimat

1691741668_indritaliu.jpg

Report TV zbardh detaje të reja lidhur me 39 vjeçarin e arrestuar se përvetësonte shuma të mëdha parash përmes mashtrimit.

Ai u prezantohej biznesmenëve si zyrtar i lartë dhe u premtonte tendera nga Ministria e Infrastrukturës në lidhje me minierat dhe ndërtimin. Një biznesmen kishte bërë kallëzim në Policinë e Tiranës pasi kishte arritur të kuptonte se ishte mashtruar nga Indrit Aliu.

"Investimin" në mashtrim Aliu e kishte avancuar duke hapur edhe një zyrë për të joshur viktimat që ai pikaste për t'i mashtruar.Ai u premtonte atyre se do t'i ndihmonte me tendera ne Ministrinë e Infrastukturës, kryesisht ne akvititetin e minierave dhe te ndërtimit. Ai u deklaronte biznesmenëve se kishte njohje brenda ministrisë dhe kundrejt shumave te parave mund t'u jepte tenderat qe ata kërkonin. Aliu rezulton i dënuar më herët për të njëjtën vepër penale, në 2011-ën me 10 vite burg, informon gazetari i Report TV, Sokol Dema

S.G/Shqiptarja.com