Erdogan akuzon shtetin grek për 'pushtimin' e ishujve të çmilitarizuar! Greqia: Do të informojmë aleatët për deklaratat provokuese

Presidenti turk Rexhep Tajip Erdogan ka akuzuar Greqinë për pushtimin e ishujve në Detin Egje që kanë status të çmilitarizuar, duke kërcënuar se Ankaraja është e gatshme të bëjë “çfarë është e nevojshme” kur të vijë koha.

 “Okupimi juaj i ishullit nuk është shqetësimi ynë. Kur të vijë koha, ne do të bëjmë atë që është e nevojshme,” tha Erdogan.

“Unë i sugjeroj Greqisë që të shikojë historinë. Nëse Athina shkon shumë larg, çmimi do të jetë i lartë. Kemi edhe një gjë për t’i thënë Greqisë, le të kujtojmë Izmirin,” tha Erdogan.

LEXO EDHE:
Dritan Hila: Pse Micotaqis duhet ta pranojë dorën e shtrirë të Ramës!

Izmiri është një provincë në bregun perëndimor të detit Egje në Turqi, nga i cili forcat greke janë dëbuar nga forcat turke. Menjëherë pas kërcënimeve të Erdoganit ka reaguar edhe Greqia, e cila tha se “Turqia do ta paguajë shtrenjtë” nëse ndërhyn në ishujt e Egjeu.

Ministria e Jashtme greke i cilësoi deklaratat e Erdoganit si provokuese, ndërsa tha se presidenti turk ka kaluar çdo kufi me kërcënimet e tij, e se për këtë do të informohen dhe aleatët.

“Greqia nuk do të ndjekë Turqinë në deklaratat dhe kërcënimet e përditshme skandaloze. Ne do t’i informojmë menjëherë aleatët dhe partnerët tanë për përmbajtjen provokuese të deklaratave të ditëve të fundit, për të bërë të qartë se kush po e dinamizon kohezionin e aleancës sonë në një periudhë veçanërisht të rrezikshme", shkruhet në njoftimin e Ministrisë së Jashtme greke.

Kjo nuk është hera e parë që ka replika mes Greqisë dhe Turqisë për ishujt e çmilitarizuar në detin Egje, pasi para një muaji ministri turk i Mbrojtjes Hulusi Akar, foli për çmilitarizimin e ishujve të Egjeut.

D.GJ/Shqiptarja.com

TAG:
• greqi
• turqi
• greqi turqi
• deti egje
• erdogan