POP 5

Lajmet më të lexuara të 5 minutave të fundit

Ekonomi

Euro ‘zhvlerëson’ edhe eksportet! Prodhimi vendas ‘në vend numëro’

Viti 2024 e thelloi edhe më shumë krizën e eksporteve. Shifrat e INSTAT tregojnë se gjatë vitit të shkuar eksportuesit humbën 67 miliardë lekë, kryesisht nga zhvlerësimi i monedhës euro. E kundërta ka ndodhur me importet. dyfishimi i tyre gjatë vitit të kaluar bëri që prodhimi i huaj të dominojë tregun vendas.   

Më pak u shitën dhe dyfish më shumë u blenë. Viti 2024 u mbyll me tkurrje të fortë të eksporteve dhe fuqizim të mëtejshëm të importeve.

Referuar shifrave të fundit të Institutit të Statistikave, eksportet gjatë vitit të shkuar janë ulur me 15.4%. Në total bizneset shqiptare kanë shitur jashtë vendit mallra me vlerën 373 miliardë lekë nga 440 miliardë lekë që ishte vlera e eksporteve në 2023-shin duke shënuar një humbje me 67 miliardë lekë. Rënien më të fortë e kanë pasur eksportet e mineraleve-energjisë elektrike me 5.3%, ndjekur nga “Tekstile dhe këpucë” me -4,8% dhe materialet e ndërtimit me tkurrje 4.1%.

Dy janë faktorët kryesorë që dëmtuan bizneset eksportuese shqiptare. Forcimi i monedhës kombëtare ‘lekë’, përkundrejt valutave, sidomos ndaj monedhës europiane, që zhvlerësoi muaj pas muaj fitimet e bizneseve eksportuese, për shkak se shitjet i kanë në euro, kurse kostot në lekë. Por nga ana tjetër ekspertët thonë se edhe ulja e çmimeve në krahasim me krizën e inflacionit ndikon në rënien e vlerës së eksporteve, pasi u shit me çmim më të ulët se viti 2023.

Ndërsa nga ana tjetër prodhimi i huaj ka zënë më shumë vend në tregjet e deri në tryezat tona. Gjatë vitit të shkuar kemi importuar mallra me vlerë 894 miliardë lekë ose 21 miliardë lekë më shumë se në vitin 2023. Praktikisht nga jashtë kemi blerë dyfish më shumë sesa kemi shitur. Sipas INSTAT vjet kemi importuar më shumë makineri, pajisje dhe pjesë këmbimi dhe ushqime.

Gjatë 2024-ës vendet me të cilat ka pasur më shumë rritje eksportesh ishin Kosova, Greqia dhe Kina, kurse rritjen më të madhe të importeve e pati me  Kinën, Gjermaninë dhe SHBA.

EKSPORTET E MALLRAVE
Viti 2023     440 mld lekë
Viti 2024     373 mld lekë
Rënia          - 67 mld lekë
 
IMPORTI I MALLRAVE
Viti 2023      873 mld lekë
Viti 2024      894 mld lekë
Rritja            +21 mld lekë
 

G.M./r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 18 Janar, 08:40

    A duhen bërë publik emrat e politikaneve që kanë përdorur Sky Ecc?

Lajme të tjera



×

Lajmi i fundit

Superkupa 'deh' Barcelonën, Getafe e ndal 1-1

Superkupa 'deh' Barcelonën, Getafe e ndal 1-1

18 Janar, 23:01