Familjarët: Amnisia bëhet për
të shpëtuar të akuzuarit e Gërdecit

TIRANE - Shoqata e Familjarëve të Viktimave të Gërdecit me anë të një peticioni, i bën thirrje Kuvendit që të vlerësojë me kujdes amnistinë e propozuar për miratim, me rastin e 100-vjetorit të Pavarësisë. Duke kërkuar që amnistia të mos falë asnjë vepër penale që lidhet me Gërdecin, ata theksuan se Kuvendi është ende në kohë që të riparojë këtë gabim në draftin e paraqitur. Shoqata e Familjarëve të Viktimave të Gërdecit shprehet në peticion se “sado e rëndësishme të jetë festa e 100-vjetorit të pavarësisë, amnistia e propozuar, nëse nuk riparohet do të jetë thjesht një pjatë e shëmtuar për të zbukuruar tavolinat e një dite ku do të hahet drejtësia me turp e bukë”.

Sipas kësaj shoqate autorët e draftit të amnistisë tregojnë se nuk kanë mësuar gjë nga tragjedia e Gërdecit, pasi nga njëra anë amnistia ka përfshirë shumë ulje dënimesh, por nga ana tjetër ka përjashtuar disa krime të rënda, autorët e të cilëve nuk do përfitojnë asnjë ulje. Në peticion shoqata shpjegon se në këtë amnisti nuk janë përjashtuar nenet 282 dhe 289 të Kodit Penal që përkthehen në “Shkelje të rregullave mbi lëndët plasëse, djegëse dhe radioaktive” dhe “Shkelje e rregullave të mbrojtjes në punë”, pasi këto janë dy veprat penale kryesore që sipas gjykatës janë konsumuar nga të pandehurit kryesorë të Gërdecit.

Më tej në peticion thuhet se është harruar të përjashtohen nga amnistia neni 161 “Shkatërrimi i pronës nga pakujdesia”, apo dhe neni 70/2 i Kodit Penal Ushtarak që bën fjalë për “Shpërdorimin e detyrës nga personeli ushtarak”, kështu që nëse procesi në Gjykatën e Apelit përfundon deri më 28 nëntor 2012, amnistia do të ulë shumë vjet nga dënimi për të pandehurit e cëcshtjes.

Shoqata e Familjarëve të Viktimave të Gërdecit i bën thirrje deputetëve që të vlerësojnë drejt peshën e atyre veprave penale që kanë treguar në praktikë se mund të marrin edhe dhjetëra jetë njerëzish.

“Këto nene janë larë me gjak të pafajshëm dhe nuk mund të trajtohen si krime të lehta për t’u amnistuar, sado festë të ketë Shqipëria. Amnistia nuk parashikon përfitim as për krime ku e ku më të lehta siç janë aksidentet rrugore me plagosje të lehta, ndërkohë që krimeve të rënda si ai i Gërdecit po i jep një shans. Me anë të kësaj amnistie nuk bëhet gjë tjetër veçse jepet mesazhi i pamoralshëm se vrasja e një fshati të tërë është e parëndësishme në një shoqëri demokratike. Gjithashtu shqetësohemi me të drejtë edhe për amnistimin e veprave penale, të cilat kanë nisur të ndiqen me nismën e të dëmtuarve akuzues siç është plagosja e rëndë. Kjo vepër penale, ndonëse në dukje është më e lehtë, është e pamoralshme që pas 3 vjetësh endje gjyqeve ato të mbyllen me rastin e një feste”, thuhet në peticionin e Shoqatës së Familjarëve të Viktimave të Gërdecit drejtuar Kuvendit.

(eç/shqiptarja.com)