TIRANË-  Që prej ditës së enjte ish kryesocialisti Fatos Nano ndodhet në një spital privat në Tiranë për shkak se gjendja e tij ishtë përkeqësuar. Burime për Report Tv bëjnë me dije se ish kryeministri u mor me ambulancë ditën e enjte në shtëpinë e tij pasi kishte probleme me frymëmarrjen.

Aktualisht ai është i intubuar në reanimacion ndërsa gjendja e tij, fatmirësisht është stabilizuar. Burime nga spitali thonë se Fatos Nano është drejt përmirësimit, gjithsesi mbetet me prognozë të rezervuar.

Ish kryeministri Fatos Nano ka pasur probleme me shëndetin edhe dy vjet më parë. Më 28 maj të 2021-shit, Nano u paraqit në spitalin e Tiranës për të marrë ndihmë mjekësore, ndërsa shoqërohej nga bashkëshortja e tij, Xhoana Nano.

Fatos Nano, 71 vjeç, ka qenë 3 herë kryeministër i Shqipërisë, ndërsa u shkëput nga politika në vitin 2005.

Ish kryeministri Fatos Nano është themeluesi dhe kreu i parë i Partisë Socialiste të Shqipërisë.

Fatos Nano ka qenë kryetar i Partisë Socialiste që nga 12 qershori i vitit 1991 e deri në vitin 2005, periudhë në të cilën shërbeu edhe si kryeministër i Republikës së Shqipërisë.