Fëmijët dhe baleti, te ArTurbina nisin spektaklet e fundvitit shkollor të fëmijëve në kryeqytet

TIRANË - Fundi i vitit shkollor po afron për të gjitha shkollat e kryeqytetit. Vogëlushët kanë kaluar një vit të gjatë, plot mësime, disiplinë, por edhe kurse jashtëshkollore. Dikush piano, dikush kitarë, dikush sporte, dhe balet.

Adela Muçollari, primabalerina e Teatrit tonë Kombëtar të Operas dhe Baletit ka akademinë e saj, ku vogëlushe të vogla fare nisin hapat e parë të baletit.

Mësimet e para të baletit klasik kanë dhënë rezultate të mrekullueshme dhe vogëlushet plot elegancë e delikatesë bëjnë spektaklin e tyre.

Balerina të tjera zgjedhin baletin modern dhe kërcejnë me tingujt e grupit të preferuar.

Të gjithë së bashku, prindër e mësues shijojnë sakrificat e një viti të gjatë, por kaq të vlefshëm për fëmijët.

Primabalerina Adela Muçollari thekson për Report TV rëndësinë e përfshirjes së fëmijëve me aktivitete artistike.

-A mund të ketë mes këtyre balerinave të vogla primabalerina të ardhshme të Tiranës? E pyesim.

"Absolutisht po", na siguron Adela, e cila shquhet dhe për një marrëdhënie të ngrohtë dhe profesionale me vogëlushet që i qasen artit të bukur, por të vështirë të kërcimit modern e klasik.

Nga viti në vit këto vogëlushe hedhin shtat, rriten me shijen e të bukurës që në të ardhmen do t'i shtohet si vlerë fëmijëve, por edhe Tiranës.

/G.M./Shqiptarja.com

TAG:
• adela mucollari