Festa e Bektashinjve në malin e
Tomorrit, nis pelegrinazhi 5 ditor 

Ka nisur edhe për këtë vit pelegrinazhi drejt malit të Tomorrit, një mal i konsideruar “i shenjtë”, pasi në të prehet shenjtori i familjes së Profetit Muhamed, Abaz Aliu.
 
Mali i Tomorrit pushtohet gjatë 5-ditëve të pelegrinazhit nga rreth 300 mijë pelegrinë nga Shqipëria, diaspora dhe mbarë bota, të cilët udhëtojnë drejt Teqesë së Kulmakut për të kremtuar festën e Baba Tomorrit.
 
Vetë pelegrinët e parë që kanë mbërritur në malin e shenjtë shprehen se çdo vit bëjnë me qindra kilometra për të mbërritur në këtë vend. 

“Kjo për të mirën e të gjithëve. Ndezëm qirinj, bëmë dua, zbritëm poshtë dhe tani po pjekim e po hamë qingjin” tha një besimtare. Ndërsa një tjetër thotë se, “Jetojmë në Amerikë, kemi ardhur posaçërisht për të therur një kurban, për një dëshirë më të mirë në këtë vend të shenjtë që e kemi këtu në Shqipëri”.

 Krenar Capollari,Shefi i Sektorit të Rendit në Komisariatin e Policisë Skrapar,bën me dije se,për mbarëvajtjen e këtij aktiviteti janë angazhuar mbi 100 forca policie.

“Duke u nisur nga urdhri i Drejtorit të Përgjithshëm të policisë dhe drejtorit të policisë Berat, kemi përpiluar një plan masash për zhvillimin e këtij aktiviteti fetar në malin e Tomorrit. Në bashkëpunim me drejtuesit vendor, kemi vënë në dispozicion të besimtarëve shërbimin zjarrfikës dhe shërbimit shëndetësor me autoambulanca me qëllim që çdo gjë të shkojë mirë".
 
Ndërkaq, Sekretari i Kryegjyshatës së Bektashinjve për qarkun e Beratit, Zalo Qato, shprehet se, këtë vit kushtet për mikëpritjen e pelegrinëve janë përmirësuar dhe janë marrë të gjitha masat për akomodimin dhe qëndrimin e tyre në këtë vend të shenjtë.






Redaksia Online
(F.T/shqiptarja.com)