Kryetari i Kuvendit Gramoz Ruçi, për të gjithë pelegrinët që janë ngjitur sot në malin e Tomorit ka shprehur përshëndetje të veçanta duke thënë se, atdheu, toleranca dhe edukimi janë kryevlerat e trashëgimisë së bektashijve. Ai shprehet se pelegrinazhi nuk është thjesht një ritual dhe përkushtim fetar, por një koncert besimi në kërkim të lumturisë.

“U dërgoj përshëndetjet e mia të përzemërta besimtarëve bektashinj që janë ngjitur këto ditë në Malin e Shenjtë të Tomorit.

Mali i  Tomorit është froni që ka bashkuar, bashkon e do të bashkojë bektashinjtë shqiptarë, në dashurinë, përkushtimin dhe sakrificat për njeri-tjetrin, për besimtarët e besimeve të tjera dhe Shqipërinë. Pelegrinazhi i sivjetëm zhvillohet në kushtet e kufizimeve dhe mundimeve që na ka imponuar pandemia. Lutem e uroj që pelegrinazhin e vitit të ardhshëm dhe festat e tjera t’i kremtojmë pasi të kemi lënë pas sakrificat e shkaktuara prej saj. Pelegrinazhi juaj nuk është thjesht një ritual dhe përkushtim fetar, por një koncert besimi dhe optimizmi, në kërkim të lumturisë e të harmonisë, që i bën njerëzit më të mirë, në një Shqipëri të begatë dhe në një  botë paqësore. Pelegrinazhi juaj na rikujton se Atdheu, Toleranca dhe Edukimi janë kryevlerat e trashëgimisë së bektashijve. Le të mësojmë të gjithë nga kjo pasuri fetare, shpirtërore, kulturore e kombëtare”, shkruan në mesazhin e tij drejtuar pelegrinëve në Malin e Tomorit, Kryetari i Kuvendit, Gramoz Ruçi.