Filmuan para Parlamentit maqedonas
policia ndalon 3 gazetarë të "Express"

Tre gazetarë të Gazetës Express, Artan Haraqija, Halil Halili dhe Ilir Ajdini janë arrestuar sot në Shkup nga policia maqedonase pa ndonjë arsye.
 
Ata janë prangosur nga autoritetet maqedonase vetëm pse kanë xhiruar para ndërtesës së Parlamentit të Maqedonisë në Shkup.
 
Ndërkohë Kryeredaktori i Gazetës Express dhe autori i emisionit Zona Express, Leonard Kerquki, nuk është lejuar t'i afrohet stacionit policor ku mbaheshin gazetarët.
 
Ekipi i Gazetës ka qëndruar sot në Maqedoni, respektivisht Kumanovë dhe Shkup, për xhirime rreth një dokumentari që ka të bëjë me ngjarjet e vitit të kaluar në Kumanovë.
 
Arrestimi ka ndodhur pavarësisht se ekipi i Gazetës Express i ka njoftuar autoritetet maqedonase se qëllimi i udhëtimit janë xhirimet. 


 
Pasi janë marrë në pyetje, gazetarët janë lënë të lirë pas rreth një orë. Lirimi i tyre ka ardhur pas ndërhyrjes së ambasadorit të Kosovës në Shkup Ylber Hysa, deputetit të BDI-së Artan Grubin dhe zv/ministrit të Brendshëm të Maqedonisë Agim Nuhiun.

Redaksia Online
l.q/Shqiptarja.com