Juventus është bërë finalistja e dytë e Kupës së Italisë, pasi ‘zonja e vjetër’ ka mposhtur pastër 2-0 në gjysmëfinalen e kthimit Fiorentinën. ‘Vjolët’ e mbyllën këtë raund të kupës pa lënë asnjë shenjë, pasi edhe në sfidën e parë në Firence ishin mposhtur 0-1. Golat në ‘Allianz Stadium’ u realizuan në pjesën e parë nga Bernadeschi dhe në të dytën nga Danilo. Në finale e 11 majit në Olimpico të Romës Juventus do përballet me Interin në atë që njihet si derbi i Italisë.

Ndërkohë në Premier League Manchester City ka bërë detyrën duke fituar 3-0 kundër Brighton dhe për rrjedhojë është rikthyer në krye. Në Etihad Stadium golat erdhën në pjesën e dytë nga Mahrez, Foden dhe Silva. Kur kanë mbetur edhe 6 javë kampionat Manchester City udhëheq me një pikë më shumë se Liverpool.

Sakaq Arsenal i ka dhënë fund ecurisë negative prej 3 humbjesh radhazi në kampionat, duke fituar me shifrat 2-4 derbin e Londrës kundër Chelsea-s. Të besuart e Arteta-s realizuan falë Nketiah dopietë, Saka-s dhe Smith Roëe-s. Në këtë fund sezoni ‘topçinjtë’ luftojnë për t’u kualifikuar në Champions League dhe falë trepikëshit kundër Chelsea-s ndajnë vendin e katërt me Tottenham-in e Antonio Conte-s.

Në La Liga Real Madrid s’ka falur Osasuna-s, që e ka mposhtur 1-3. Një fitore që afron ‘galaktikët’ shumë pranë me titullin kampion. Përveç golave të realizuar nga Alaba, Asensio dhe Vazques vlejnë për t’u theksuar edhe dy penallti të humbura nga Benzema.