Banori i Borizanës në Report TV: 40 denoncime për guroret në komisariatin e Fushë Krujës! Shefi na tha po dolët të bllokoni guroret ju vë prangat

FUSHË KRUJË- Një grup xhirimi nga Report TV udhëtoi drejt Borizanës, 7.5 km larg Fushë Krujës, në fshatin që mbi kokë kanë gurore. Njëra prej tyre është e Përparim Rrajës, kushëririt të deputetit socialist, Ramazan Rraja.

Shpërthimet e fuqishme me dinamit prej kohësh janë kthyer në shqetësim për banorët e Borizanës të cilët thonë se po u shkatërrohen shtëpitë. Pikërisht pse u ankuan dy banorë të fshatit, kushërinj të fisit Maja u dhunuan barbarisht me shkopinj gome e bejsbolli nga anëtarë të fisit Rraja, të cilët mësynë lokalin mesditën e 6 korrikut. Mes dhunuesve ishte dhe djali i Ramazan Rrajës dhe dy vëllezërit e tij.

Nazmi Ruda, banori i zonës denoncon situatën dramatike në të cilën ndodhet fshati.Thotë se janë bërë 40 denoncime për guroren e fisit Rraja në komisariatin e Fushë Krujës dhe në vend që të merren masa janë kërcënuar nga shefi i këtij komisariati me burg e pranga nëse dalin të protestojnë për të bllokuar aktivitetin e tyre. Madje bën me faj shtetin i cili nëse do të kishte ndërhyrë në koha dhuna barbare dhe konflikti mes dy fiseve nuk do të ndodhte.

Kryetari i degës që banori thotë se i ka kërcënuar me burg është ish shefi i komisariati të Krujës Elton Shahini, i cili mbante denoncimet e qytetarëve në sirtar. Report TV mësoi se ishte larguar nga detyra vëtëm pak kohë para ngjarjes. Burime në Drejtorinë e Përgjithshme të Policisë thanë se jo vetëm për rastin e sulmit barbar ndaj kushërinjve Maja, por për çfarë ndodh në Krujë, është ngritur një grup special hetimor. Do hetohet për kallëzime jo vetëm të fshatarëve të Borizanës, në lidhje me guroren që po u shëmb shtëpitë, por edhe të personave të tjerë, nga zyrtarë të lartë, pushtetarë vendorë, drejtues institucionesh, juristë, policë, shumë prej tyre të dorëhequr, si viktima të terrrorit, shantazhit dhe kërcenimeve.

Po të kishte marrë shteti masa nuk do kishte ndodhur kjo. 40 denoncime i kemi bërë në komisariatin e Fushë Krujës. I ke me fakte, kemi bërë takim me shefin e degës dhe na ka thënë po dolët e bllokuat guroren jeni të gjithë në burg. I kemi thënë jemi 50 familje. Çfarë të bëjmë?  Po qe ashtu na jepni lekë e të ikim nga Borizani. Jemi autoktonë këtu, por këto nuk marrin masa. Kryetari i degës thotë unë i vë hekrat për 30 minuta. Si i vë hekrat?! Një herë na mbyti tërmeti, tani dhe kjo"

Ajo çka kuptohet është se shpërthimet e guroeve nuk janë shqetësuese vetën për fisin Maja por dhe banorë të të tjerë të fshatit Borizan të cilët nuk kërkojnë të ndalet aktiviteti i guroreve por shteti të kontrollojë aktivitetin e tyre me qëllim të ata të mos shohin banesat që i kanë bërë me djersë të shemben.

“Shteti fle gjumë. Nuk merr asnjë masë. Ne nuk kemi asnjë problem  me asnjë fis, as me Rrajat. Por unë si banor, kam kërkuar të merren masa të paktën ti bllokojnë për momentin. Këtë apel e kam bërë në Report TV edhe para një muaji. Na nuk duam probleme me asnjë fis por duam shtëpitë tona që i kemi bërë me djersë. Na me zor mbajmë fëmijët me bukë jo më të na prishin shtëpitë”, thotë ai.

Kërkesat e banorëve për shtetin ka qenë të qarta. Banori thotë se nëse shteti nuk do marrë masa urrejtja mes dy fiseve do përshkallëzohet

"Shteti ti bllokojë. Të verifikojë dokumentet.Sa është kriteri i plasjes. Po të kishte marrë shteti masa nuk do kishte ndodhur kjo..Prit se nuk ka fillu hala. Cunat po mjekohen po mbledhin fisin. Mu më vjen keq për dy fiset por nis hasmëria dhe shteti bën punën e arbitrit kush e fut golin ma parë. Është turp o vëlla!”vijoi ai."

 Banorët thonë se shpërthimet në gurore janë bërë shqetësuese dhe pronarët po i kërcënojnë.

“Problemi është të marrë masa shteti.  Gurorja ka nja 2 muaj që ka ardhur, se ne s’kemi pas probleme. Kur erdhi firma Shijaku dhe Rraja, u bënë nja 20-30 gurore. Dy çunat e lagjes sonë, që kanë gurore, s’na kanë bërë probleme ky na thotë do ju rrah, do ju vras”, tha banori për Report Tv.

Dhuna për guroren
Anëtarë të fisit Rraja dhunuan në mënyrë brutale dy kushërinjtë Bilbil dhe Jashar Maja, të cilët ishin ankuar se shpërthimet gjatë punimeve në gurore, po u shkatërronin banesat e tyre por dhe të zonës përreth. Mesditën e 6 korrikut 2023, ata ishin në lokal me inxhinierin e gurores për ti kërkuar që shpërthimet të ishin më të kontrolluara pasi po u dëmtoheshin banesat, kur grupi i dhunuesve mësyu lokalin dhe ata bien pre e një dhunë barbare.

Gurorja është në pronësi të Përparim Rrajës, kushëriri i deputetit, i cili ka leje shfrytëzimi dhe licencë për këtë aktivitet. Për dhunën e ushtruar ndaj kushërinjve Maja, policia ka arrestuar 4 persona, ndërsa 4 të tjerë janë shpallur në kërkim, mes tyre Rexhep Rraja djali i deputetit dhe dy vëllezërit e deputetit socialist të Krujës, Flamur dhe Xhelal Rraja. 

Rendit zhvillimet sipas orarit:

Të Fundit Të Parat

SI.E./A.M./Shqiptarja.com

TAG:
• xhelal rraja
• Flamur Rraja
• rexhep rraja
• perparim rraja
• fushe kruje
• Durres
• Rrajat dhunojne per guroren