Në botë ka shumë diktatura, ka shumë udhëheqës që kryejnë krime mbi popujt e tyre. Në botë ka liderë politikë që kanë kryer krime lufte dhe genocid. Nxjerrja e tyre para drejtësisë është një çlirim për njerëzit, lehtësim për shpirtin e viktimave. Ama kjo mund të bëhet vetëm me drejtësi, duke ndjekur standarde të njëjta, respekt për institucionet dhe gjykatat dhe, sidomos, respekt për ligjin dhe rregullat ndërkombëtare të të drejtave; përndryshe jemi në një situatë që jo vetëm i bën gjërat më keq, por shkel edhe idealin dhe aspiratën që do të thotë drejtësia e vërtetë.

Ja disa fakte mbi regjimin në Venezuelë. Sipas OKB-së, gjatë vitit 2019 janë vrarë me ekzekutime jashtëligjore, në protesta dhe nga dhuna dhe arrestimet detyruese rreth 20 mijë vetë. Sipas organizatave të ndryshme si Provea, nga viti 2013 deri në 2023 janë vrarë rreth 20,300 vetë.

Në vitin 2019, presidenti Trump njohu udhëheqësin e opozitës, Juan Guaidó (menjëherë pas Trump e njohu edhe Edi Rama; asnjë lider europian nuk e njohu). Në vitin 2024, presidenti Biden tha se zgjedhjet i fitoi Gonzales, duke deklaruar se Maduro i vodhi zgjedhjet; Biden njohu Gonzales si fitues. Trump nisi disa muaj më parë politikën që dihet dhe po arrijmë këtu.

A do t’i bëjë kjo gjërat më mirë në Venezuelë? A vendos kjo një standard moral në rendin botëror apo e shkatërron atë plotësisht? Meqë vërehet një entuziazëm tek disa prej nesh në popullin tonë, a ngjan regjimi i Maduros me ne dhe a na përfshin Trump Corollary (pjesë e Strategjisë së Sigurisë së SHBA-së që kërkon kontroll të plotë mbi Amerikën e Jugut)? Kurrë qëllimi i mirë nuk arrihet duke përdorur mjete të këqija, amoralë apo të paligjshme. Nga pikëpamja konservatore, ideja thelbësore është se qëllimi i mirë arrihet vetëm me mjete të mira, të moralshme dhe të ligjshme. Kur mjetet nuk janë të tilla, atëherë qëllimi nuk mund të jetë i tillë.