President i Partisë së Lirisë, Ilir Meta ka reaguar ndaj deklaratave të Ivica Daçiç ku gjatë një tubimi elektoral Daçiç tha se ‘herët a vonë, flamuri serb do të valëvitet në Prizren”.

Meta e ka cilësuar situatën si një provokim dhe në reagimin e tij u ka bërë thirrjë shqiptarëve me të drejtë vote në Serbi që të marrin pjesë në zgjedhjet e 25 tetorit.

Në reagimin e tij, Meta shprehet se Daçiç mund të shkojë në Prizren nëse ka nostalgji për fëmijërinë e tij, duke iu referuar edhe këngës “Mora mandolinën”, të cilën thotë se e ka dëgjuar disa herë ta këndojë.

Sipas kreut të Partisë së Lirisë vëmendja nuk duhet të përqendrohet te provokimet, por te mobilizimi i shqiptarëve për zgjedhjet në Serbi.

Meta u bën thirrje institucioneve dhe politikanëve në Shqipëri e Kosovë që të nxisin pjesëmarrjen e shqiptarëve të Luginës së Preshevës, Kosovës dhe diasporës, të cilët kanë të drejtë vote në Serbi, në mbështetje të listës së përbashkët “Koalicioni Shqiptar”.

Reagimi i plotë i Metës:

Ivica Daçiç mund të shkojë në çdo kohë në Prizren nëse ka nostalgji për fëmijërinë e tij dhe ta këndojë edhe këngën "Mora mandolinën", ashtu siç di vetëm ai dhe siç e kam dëgjuar live disa herë.

Por nuk është koha për t'u marrë me provokimin e tij, që nuk ka pse të habisë askënd, pas nderimeve publike shtetërore, që ju bënë Kasapit të Srebrenicës, Ratko Mlladiç.

Në këto dy javë të gjitha institucionet e Shqipërisë dhe Kosovës, të gjithë politikanët e Shqipërisë dhe të Kosovës, duhet t'ju bëjnë thirrje të gjithë shqiptarëve në Luginën e Preshevës dhe në Serbi, të gjithë shqiptarëve në Kosovë, në Zvicër, SHBA dhe kudo në diasporë, që kanë të drejtën e votës në Serbi, të bëjnë çdo sakrificë dhe të votojnë në zgjedhjet e 25 tetorit në Serbi për Listën e Përbashkët "Koalicioni Shqiptar".

Në veçanti, ju bëj thirrje të gjithë studentëve shqiptarë nga Lugina, që studiojnë në Shqipëri dhe Kosovë, të gjithë atyre që janë diplomuar në Shqipëri dhe Kosovë, të japin të parët shembullin, jo vetëm duke votuar më 25 tetor në Serbi, por edhe duke u bërë thirrje familjarëve, të afërmve, miqve dhe të njohurve të tyre shqiptarë kudo ku janë, me të drejtë vote në Serbi, që të votojnë edhe ata.

Kjo mundësi historike nuk duhet humbur!

Është e vetmja rrugë, për të mbrojtur të drejtat e shqiptarëve në Serbi, për t'i dhënë fund pasivizimit të adresave që është një genocid i pastër edhe pse i padukshëm, por në thelb ekstreminues për shqiptarët e Luginës së Preshevës dhe Serbisë.

Ndaj të gjithë duhet të punojnë për këtë qëllim, që të ketë sa më shumë deputetë shqiptarë në Parlamentin e Serbisë, që të ngrenë zërin që Qeveria e Serbisë të respektojë marrëveshjet në të kaluarën.

Sa më shumë deputetë shqiptarë të ketë në Parlamentin e Serbisë, aq më i mundshëm është edhe demokratizimi i Serbisë dhe avancimi i të gjitha çështjeve që prekin drejtpërdrejt jetën, të drejtat dhe të ardhmen e shqiptarëve në Preshevë, Bujanoc e Medvegjë dhe në Serbi.

Edhe 13 ditë që shqiptarët e Serbisë të kenë përfaqësimin më të fuqishëm dhe më historik në Parlamentin e Serbisë dhe t'ja këndojnë aty live Ivica Daçiçit këngën "Mora mandolinën", që dhe ai të çmallet me fëmijërinë e vet.