Vdekja e Tanushit, NATO: Jeta e tij do kujtohet/ Rama: Shembull i lavdishëm i sakrificës

“I bekuar nga Zoti është ai që jetën ja fal atdheut!”. Me këto fjaë ka shprehur ngushëllimet familjarëve të major Tanushit, deputeti i Partisë Socialiste, Ulsi Manja. Një urim për patriotin e tij, birin e Dibrës i cili u nda nga jeta mbrëmjen e djeshme.

"Njeriu është qenie e vdekshme dhe vdekje ka çdokush që lind, por i bekuar nga Zoti është ai që jetën ja fal ATDHEUT ! Major Klodian TANUSHI la në zi familjen e tij , miqtë dhe shokët, por sa të ketë komb shqiptar do ketë dhe një datë që kombi do ta nderojë si dëshmor !

U prehsh në paqe biri i Dibrës ! Dibra përherë i ka dhënë Kombit gjakun e më të mirëve, dje në luftë e sot për paqe", shkruan Manja.

Kreu i Partisë Demokratike ka qenë mesditën e sotme në familjen e majorit Klodian Tanushi, e cila ka hapur dyert e mortit pasi mësoi lajmin e hidhur për ndarjen nga jeta të tij.

Gjatë vizitës, Basha  shoqërohej nga ish-deputeti i Dibrës Xhemal Gjunkshi, i cili ka qenë Shefi i Shtabit të Përgjithshëm të Forcave të Armatosura të Shqipërisë. Në pritje krahas familjarëve të Tanushit, janë vënë edhe ish-kolegët e majorit.

Lideri demokrat vlerësoi lart ushtarakun e rënë në krye të detyrës dhe ngushëlloi familjen Tanushi nga Dibra për humbjen e madhe.

Deputetja socialiste Mimi Kodheli ka ndarë një foto me major Klodian Tanushin, i cili u nda nga jeta ditën e djeshme pas shpërthimit të ndodhur në Letoni në datë 6 Maj si pasojë e të cilit humbi jetën edhe nëntetarja Zarife Hasanaj. Në foto shfaqet Kodheli teksa i dhuron major Tanushit flamurin shqiptar, si pjesë e kontigjentit të parë në Letoni.

"14 qershor 2017 - Ceremonia e përcjelljes së kontigjentit të parë në Letoni
Do të mbetesh i paharruar në zemrën dhe mendjen time!", shkruan Kodheli krah fotos.

Shembull i lavdishëm i sakrificës së Forcave tona të Armatosura! Kështu e ka cilësuar kryeministri Edi Rama, major Klodian Tanishit, ushtarakun e rënë në detyrë me mision në Letoni. Me një mesazh në Twitter, Rama ka ngushëlluar familjarët e 39-vjeçarit.

"Flamuri kombëtar në zi! Fatkeqësisht edhe Klodian Tanushi,ushtaraku ynë i angazhuar në misionin e NATOs ku humbi jetën dëshmorja Zarife Hasanaj,s'u mbijetoi dot plagëve!Ai u nda nga jeta si një dëshmor i atdheut e shembull i lavdishëm i sakrificës së Forcave tona të Armatosura", shkruan Rama.

Kryetarja e LSI, Monika Kryemadhi u bashkohet krerëve të partive politike që shprehin ngushëllime familjarëve për vdekjen e major Klodian Tanushit.

"Një tjetër lajm i rëndë e një tjetër dhimbje e madhe për të gjithë ne.

Ka humbur jetën edhe Major Klodian Tanushi!Nuk ka fjalë që të mund të shpreh ngushëllimin e as zemër që të mbajë peshën e dhimbjes, por me gjithë shpirt e zemër jam në këto çaste të rënda pranë familjes Tanushi, për të ndarë dhimbjen me bashkëshorten dhe fëmijët e Klodianit, i cili do të mbetet përjetësisht në altarin e nderit dhe të krenarisë shqiptare!

I ndrittë shpirti dhe u prehtë në paqe", shkruan Kryemadhi

Një ditë pas vdekjes së major Klodian Tanushit, misioni i përforcuar i grupit të prezencës së NATO-s në Letoni ka shprehur ngushëllimet familjarëve.

"Është dhimbje e madhe që sot ka ndërruar jetë Major Klodjan Tanushi. Ne i shprehim ngushëllimet tona më të thella bashkëshortes, fëmijëve dhe të afërmve të tij. Pasi luftoi për jetën e tij, Major Klodjan Tanushi vdiq nga lëndimet e pësuara gjatë një detyre të EOD, në vijën e detyrës më 6 maj 2019, që mori gjithashtu jetën e Nëntetares Zarife Hasanaj. Kemi humbur një nga tanët, një vëlla nën armë. Në këto kohë dhimbjeje, mendimet tona shkojnë tek të dashurit, miqtë dhe kolegët e tij. Jeta e tij do të kujtohet", shkruhet në njoftimin e NATO-s.

Në bazën e  NATO-s "Camp Arena" në Herat Afganistan flamuri shqiptar është ulur në gjysmë shtizë. Kontigjenti i V-te Paqeruajtës nderoi veprën sublime të dëshmorëve të rënë Letoni.

Ndërkohë që kryetari i Kuvendit, Gramoz Ruçi, u dërgoi sot një mesazh ngushëllimi fëmijëve, bashkëshortes dhe familjarëve të majorit Klodian Tanushi. “Ndaj dhimbjen me fëmijët, bashkëshorten dhe familjarët e komandantit trim, majorit Klodian Tanushi.

"Klodian Tanushi është një engjëll mbrojtës i paqes dhe ra dëshmor për Shqipërinë, Letoninë dhe Europën, për garantimin dhe mbrojtjen e jetës së qytetarëve letonezë dhe europianë. Shqipëri, ji krenare për bijtë e tu që sakrifikohen për sigurinë e qytetarëve të Europës dhe të botës!”, shkruan në mesazhin e tij kryetari i Kuvendit, Gramoz Ruçi.