Ralf Gjoni pranoi që të marrë mandatin e deputetit duke thyer vendimin e Lëvizjes Socialiste për Integrim. Pas vendimit ai ka dhënë edhe arsyet se përse vendosi që të pranonte mandatin nga lista e LSI-së në qarkun e Tiranës. Gjoni thotë se ky ka qenë vendimi më i vështirë politik që ka marrë.

"Ishte vendimi më i vështirë politik të cilin e kam marrë pas një konsultimi të gjerë. Kam vendosur të vazhdoj shërbimin tim ndaj axhendës Euro-Atlantike të vendit e të jem në krahun e drejtë të historisë. Emri im  nuk mund t’i shërbejnë kurrë destabilizimit të vendit. Shqiptarët meritojnë qetësi, progres e shpresë për të ardhmen.  

Ndaj sot të gjithë duhet të marrin përgjegjësitë që kanë për të garantuar funksionimin normal të Parlamentit, si themel i shtetit shqiptar" tha ai.  Ralf Gjoni  ka qenë ish-sekretar ndërkombëtar i LSI-së dhe ish-zëdhënës i Ministrisë së Punëve të Jashtme, por edhe ish-këshilltar për politikën e Jashtme pranë kryetarit të Kuvendit, Ilir Meta.

Gjithashtu, sot KQZ ju dha mandatin edhe dy deputetëve të tjerë të PD, Alban Zeneli dhe Ligoraq Karamelo. KQZ njoftoi edhe 14 kandidatët e radhës për të marrë mandatet, 10 ditë kohë për dorëzimin e formularit të vetëdeklarimit. Opozita e re parlamentare me 15 deputetë.