Fletët e votimit në rrezik

Pas ankesës së PS-së, Komisioni Qendror i Zgjedhjeve korrigjon numrin e fletëve të votimit që do të prodhohen në Slloveni. KQZ muajin e kaluar porositi të shtypen tek kompania sllovene CETIS, 3 million e 337mijë fletë votimi, ashtu siç e parashikon kodi, 2% më shumë se numri i zgjedhësve.

Por sipas të majtëve ka diferencë të madhe mes kësaj shifre dhe numrit të votuesve realë në 46 nga 89 zonat e administrimit zgjedhor. Pas verifikimeve në 493 qendra votimi, listat mbi të cilat u porositën fletët ndryshojnë me 63 deri në 100 zgjedhës për qendër me listat e KZAZ-ve.

Po ashtu në pikëpyetje është vënë dhe prodhimi në kohë i fletëve të votimi për zgjedhjet e pjesshme vendore në 4 komunat ku kryetarët garojnë për deputet.

Problemi lind në faktin se asnjë shtëpi botuese brenda vendit nuk mund të printojë  fletë votimi me elementë teknikë të parashikuara në nenin 98 të Kodit Zgjedhor, në formën e kodeve që identifikojnë zonën zgjedhore, QV, dhe elemente të tjera identifikuese që nuk lexohen me sy të lirë.

Kjo ishte dhe arsyeja që fletët e zgjedhjeve parlamentare u vendos të shtypen në Slloveni, ku firma kërkoi minimalisht 1 muaj kohë.

Shkrimi u botua sot në gazetën Shqiptarja.com (print) 06.06.2013
 
Redaksia Online
(b.m/shqiptarja.com)

TAG:
• kqz