Flutura Açka përkujton 4-vjetorin e vdekjes së të birit: Veç luleve e qirinjve kam për të vendosur pranë fotos së tij edhe librin e ri, e t’i them se premtimin e kam mbajtur

4 vite pas vdekjes së djalit të saj, deputetja e Partisë Demokratike, shkrimtarja Flutura Açka, ka kujtuar të birin me një shënim të shkurtër në rrjetin e saj social Facebook. Veç, luleve e qirinjve, shkruan Açka, sot ka për të vendosur pranë fotos së tij edhe librin e ri.

‘Te kujtimet, e në ç’tjetër gjë mund të mbahemi pa u rrëzuar?

Disa ditë më parë, një mike, e cila kishte humbur vajzën e saj adoleshente në krye të marsit, më pyeti se si ia kisha dalë ta përballoja humbjen e tim biri?

LEXO EDHE:
Vrasja e 14 vjeçarit, Flutura Açka: U harrua thelbi i familjes po endet drejt spektaklit! Urgjente hapja e shkollës së riedukimit

A ia kam dalë?

Nuk ia thashë që kam drojë se nuk ia kam dalë. Koha pas humbjesh të tilla, që të marrë kuptim, siç thotë Hamleti, “del vetëm nga kyçet”. Pa na u shpërbërë ato, nuk e dimë në kemi rrojtur ndonjë ditë si jetimë të fëmijëve tanë.

Pak ditë nga 5 maji i vitit 2018, kur humba tim bir, një mike, e cila sapo më kishte shpjeguar se mezi numëronte ditët për të shkuar te e bija studente në Europë, më pyeti se si e përballoja kohën. I thashë e qetë e pa e fajësuar për shkujdesjen e pyetjes: “Ja, sikurse ti, duke numëruar ditët, por ty të mbarojnë, mua jo!”

Sonte, katër vjet nga lamtumirës me të, veç luleve e qirinjve, kam për të vënë pranë fotos së tim biri edhe librin e ri… e t’i them se…

e kam mbajtur fjalën!

Ju lutem, miq, mos shkruani mesazhe ngushëllimi. Faleminderit për mirëkuptimin!’- shkruan Açka.

 

M.Q./Shqiptarja.com

TAG:
• flutura acka