SHBA - Lando Norris me McLaren do niset i pari në garën e Las Vegasit. Piloti britanik ia doli të sigurojë kohën më të mirë në kualifikuese me kohën 1 minutë, 47 sekonda e 934 të mijëtat, duke marrë një asist të konsiderueshëm në garën për titullin kampion, tre gara nga fundi i sezonit.

Në vendin e dytë u rendit Max Verstappen me Red Bull, që kompleton kështu vijën e parë të nisjes. Në vendin e tretë spanjolli Carlos Sainz me Williams, ndërsa britaniku George Russell me Mercedes do ta nisë garën nga vendi i katërt.

Provat zyrtare u zhvilluan në një pistë të lagur për shkak të shiut. Pilotët i nisën ato me gomat për pistë të lagur dhe i mbyllën me gomat e ndërmjetme, por për fat nuk pati incidente të mëdha, paçka se provat u ndalën në disa raste.

Dështoi me sukses Ferrari, me Charles Leclerc që do e fillojë garën nga vendi i nëntë. Ndërkohë shtatë herë kampioni i botës, Lewis Hamilton, do e fillojë garën nga pozicioni i 20-të (i fundit), duke kompletuar kështu një sezon të dështuar.

Gara e të dielës në Las Vegas nis në orën 05:00 të mëngjesit me kohën shqiptare.

Tre gara nga fundit i sezonit, Lando Norris me McLaren kryeson me 390 pikë, ndjekur nga shoku i skuadrës, Oscar Piastri me 366 pikë. Në vendin e tretë Max Verstappen me 341 pikë.

Rendit zhvillimet sipas orarit:
Ora 09:55
Zhgënjim te Ferrari, Leclerc: Shtatë vite e njëjta histori! Hamilton: Sezoni më i vështirë në karrierë

Në Las Vegas, Charles Leclerc do e fillojë garën nga pozita e nëntë, ndërsa Lewis Hamilton nga vendi i fundit. Pas provave zyrtare, dyshja e Ferrarit kanë komentuar ecurinë e këtij sezoni.

"Është kështu sa herë që bie shi, për shtatë vjet, është gjithmonë e njëjta histori, gjithmonë i njëjti problem. Provojmë gjëra të ndryshme, por është e kotë, nuk kam më shpjegime. Nëse bie shi, e dimë tashmë se çfarë të presim. Mundohem të dal në pistë dhe të mos mendoj për të, por është e kotë. Në përpjekjen time të fundit nuk kisha më shanse për më shumë, edhe pa një gabim të vogël që bëra, nuk do të isha përmirësuar gjithsesi. Nëse shoh hendekun... nuk e di, është vërtet e vështirë për ta kuptuar", tha Leclerc.

Një koment kishte edhe nga Hamilton.

"Nuk mund të bëhet më keq. Kisha një flamur të verdhë në kthesën e fundit dhe pastaj duke hyrë në kthesën e shtatëmbëdhjetë kishte një flamur të verdhë, kështu që më duhej ta lija gazin. Arrita në vijën e finishit dhe ishte e kuqe, por nuk mendoj se do të kishte bërë shumë ndryshim.

Kur arrita në vijën e finishit ishte e kuqe, kështu që nuk kishte keqkuptim me veten time. Në sektorin e parë nuk munda t'i ngroh gomat, ato ishin si akull dhe kështu ishin edhe frenat, po përpiqesha të ndalesha. Është për të ardhur keq sepse djemtë bënë një punë të shkëlqyer.

Kisha ritmin për të vazhduar, por nuk kam shumë për të thënë. Nuk munda ta bëja xhiron. Përplasa dritat e kuqe në kthesën e fundit, kështu që nuk e përfundova xhiron time. Ky është padyshim viti më i vështirë i karrierës sime. Do ta provojmë nesër. Mendoj se kemi një makinë vërtet të mirë, por do të jetë shumë, shumë e vështirë të kthehem në garë nga vendi i fundit", tha shtatë herë kampioni i botës.

S.Dh/Shqiptarja.com