POP 5

Lajmet më të lexuara të 5 minutave të fundit

Opinion

Frrok Çupi: Tre konflikte në një ditë

Ne shqiptarët dhe fqinjët tanë të afërt, të prirë fort drejt mistikës, nuk e pranojmë numrin tre; numri tre thonë se sjell të liga. Prandaj kemi thënë e kemi kënduar për ‘dyshin’, deri edhe në këngën “ Dy gëzime në një ditë!’. 

Frrok Çupi: Tre konflikte në një ditë

Fredi Beleri dhe Albin Kurti

Pse janë tre? Duhej të ishin o dy, o katër, o pesë…

Ne shqiptarët dhe fqinjët tanë të afërt, të prirë fort drejt mistikës, nuk e pranojmë numrin tre; numri tre thonë se sjell të liga. Prandaj kemi thënë e kemi kënduar për ‘dyshin’, deri edhe në këngën “ Dy gëzime në një ditë!’. Vetëm në ngjarje ‘të mallkuara’ mund të përdoret numërimi ‘tre’. Rasti i tanishëm i ‘tre konflikteve’ është shumë i volitshëm, përderisa treshi shoqërohet me një akt të mallkuar ndër njerëz, siç është konflikti.

Të tre konfliktet u projektuan në tre shtete ballkanike.

I pari në Kosovë,

I dyti në Maqedoni,

I treti në Shqipëri.

Të tre u projektuan me teknikën djallëzore që secili të lindte edhe nga tre apo trembëdhjetë konflikte të tjerë. Ballkani, si një gadishull i mbushur me pyje halorë, e njeh mirë se si ndodh me pishat kur e sulmon infeksioni i procesionares. Procesionarja është ai mikroinsekt, i padukshëm, që lëshon me miliona larva në minutë dhe kështu i përvishet kurorës së pishës derisa e rrëzon të vdekur. Konflikti këtu, i quajtur ‘procesionare njerëzore’ me shumëfishin e numrit tre, do ta rrëzonte përdhè jetën e shteteve ballkanike njësoj si pemën me kurorë.

Ç’pjellë tjetër do të sillte konflikti i Kosovës brenda në Kosovë? Në Prishtinë kulmon konflikti i ballkanasve të pakënaqur me Perëndimin. Kryeministri u ka treguar gishtin aleatëve të mëdhenj që krijuan Kosovën shtet, dhe ata tani janë ‘ të ngrirë’ ndaj interesit të Kosovës. Situata e ka prurë pikozën e kryeministrit deri në pikën zero; ai nuk di çfarë bën, nuk e di ku të drejtohet, asnjë derë dhe asnjë kufi nuk i hapet në Perëndim. Shumë shpejt kjo do të sjellë pakënaqësinë e gjerë ose themi konfliktin e popullit me qeverinë e zgjedhur prej popullit.

Deri tani është ndjerë pesha e izolimit dhe e kufizimeve nga Bashkimi Europian. Sipas institucioneve të larta financiare botërore (Fondi Monetar dhe Banka Botërore), pesha e koncesioneve po rëndon ekonominë dhe në të ardhmen mund ta rrëzojë. Nuk ka më investitorë të huaj dhe as projekte perëndimore. Konflikti i hapur në Veriun e Kosovës duket sikur ‘nuk është më’, por në fakt po ushqehet më shumë. Organizatat e shpallura nga qeveria e Kosovës si “organizata terroriste’ po paguhen me paga marramendëse po nga qeveria e Kosovës. Kjo hap dy konflikte të tjerë: Konfliktin e popullit me qeverinë që natën paguan ‘ terroristët’, ndërsa ditën i mallkon. Dhe konfliktin e dytë e manifeston me Serbinë. Në sulmin artificial kundër Serbisë bëjnë garë të gjithë palët politike në Kosovë, ndërsa qeveria ka interes që të ruajë tensionin në kufi: Aty zhvillohet trafiku i paligjshëm, aty kontrabanda, aty droga dhe krimi. Gjithçka ndodhi këto kohë në Kosovë me izolimin e vendit ka kuptim vetëm ruajtjen e ‘ zonës tampon i ndotur’ në kufirin verior. Konflikti në Maqedoninë e Veriut shpërtheu si ‘procesionare’ që vjen nga Kosova.

Kryeministri i Kosovës, i izoluar nga bota Perëndimore, iu drejtua Maqedonisë ku jetojnë shumë shqiptarë etnikë dhe vendosi të bëjë një ‘Fjalim Marshimi”. Qëllimi ishte jo vetëm t’i dëshmonte Amerikës dhe BE se ‘ më duan shqiptarët, gajle pse nuk më doni ju!”. Efekti shkoi shumë më larg. Presidenti i Serbisë u ankua para botës se ‘ Kurti po projekton Shqipërinë e Madhe’. Ndërsa presidenti i Maqedonisë ngriti alarmin se ‘ Kurti solli konfliktin mes nesh në Maqedoni’. Albin Kurti e mbarti konfliktin e tij me Perëndimin si një konflikt etniko- politik në Maqedoni. Ai e çoi punën deri aty sa edhe rrugëve të shtetit tjetër, Maqedoni e Veriut, t’u vërë emrin e miqve të tij. Nuk është thjesht marrëzi. Mund të kthehet prapë konflikti që kishte zënë vend para Marrëveshjes (së Parë) të Ohrit mes kombësive në Maqedoni. Kurti e ka të fortë urrejtjen me “ marrëveshjen e Ohrit’. Konflikti në Shqipëri, ky do të kishte spektër më të gjerë.

Këtë konflikt po mundohet ta ndezë qeveria e Greqisë, por me mjete shumë të vjetra dhe me organizata të spektrit nacionalist e terrorist si ‘Vorio Epiri’ ose ‘Agimi i Artë’. Mirëpo qeveria shqiptare po sfidon konfliktin dhe vetë pretendimet greke, që me sa duket po e nxjerrin ‘nga fiqiri’ politikën e vendit fqinj. Një ditë para ditës së Shën Mërisë, dy kryetarë të bashkive greke, një nip i kryeministrit Micotakis dhe një tjetër me mbiemër provokativ ‘ Zervas’ sollën disa njerëz në Himarë dhe kërcënuan me rrëzimin e shtetit. Arsyeja ishte pse një njeri i kapur duke vjedhur vota, ish kandidat për kryetar Bashkie, ndodhet në burg.

Heroi Beleri është një njeri i dënuar si nxitës i urrejtjes nacionale mes Grekeve e Shqiptarëve; ai është kapur edhe në akte terroriste ku janë vrarë ushtarakë shqiptarë. Ky ishte i zgjedhur i Greqisë për kryetar Bashkie, por ra në burg. Greqia e di se kjo punë nuk bëhet, dmth., ai nuk nxirret nga burgu, por e përdor Belerin për disa konflikte të tjerë: Konflikt për çështjen Çame, kthimin e Ligjit të Luftës, bllokim i pronave të shqiptarëve, konflikt në BE për anëtarësimin e Shqipërisë dhe më në fund fitila për organizatën antiamerikane të Berishës që po përkrah zgjedhjen e Belerit.

Ajo që ndodhi në Himarë- Shqipëri, ajo ishte më e dukshme se kërkohet një konflikt me Perëndimin. Përballë protestës së qeverisë greke ndodheshin ish- kryeministri i Anglisë, Blair dhe kryeministre e Italisë, Meloni. Po të mos ishin këta aty, zor se do të mundoheshin grekët të vinin deri në Himarë. Konfliktin duan ta çojnë në dyer të Europës.

SI.E./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    27 Nëntor, 11:43

    Si e vlerësoni vendimin e GJKKO që liroi Berishën nga arresti shtëpiak?

Lajme të tjera



×

Lajmi i fundit

Ja pse 'lirimi' i Sali Berishës i gëzoi të gjithë

Ja pse 'lirimi' i Sali Berishës i gëzoi të gjithë

27 Nëntor, 23:04 nga Flogert Muça