"Frroku", Akuza: Ndoka zbuloi
targën, si s'e ka parë autorin?!

Prokuroria e Krimeve te Renda konfirmon se ka përgatitur apelimin e pafajësisë ndaj Arben Frrokut dhe do e depozitojë të martën pranë Gjykatës së apelit për krime të rënda. Burime nga Prokuroria bëjnë me dije për A1Report se prova kryesore ku është mbështetur apelimi është dëshmitari i mbrojtur i drejtësisë Arben Ndoka.

Sipas akuzës, dëshmitari Ndoka ka qenë në vendin e ngjarjes dhe kjo konfirmohet nga kamerat e sigurisë së bizneseve pranë vendit të ngjarjes. Ndërkohë mësohet se për të rrëzuar pafajësinë e dhënë nga shkalla e parë, prokuroria do t’i përmbahet tre pyetjeve kryesore që sipas saj gjykata i ka lënë pa përgjigje.

Prokuroria është e bindur se dëshmitari Arben Ndoka ka thënë të vërtetën mbi targën e makinës që u përdor nga autorët për të ekzekutuar Dritan Lamaj, madje sipas saj kjo e vërtetë është mbështetur nga zv.Drejtorët e policisë Agron Kuliçaj dhe Tonin Vocaj të cilët kanë drejtuar hetimet më 24 shkurt 2013 kur u vra Lamaj.

Një tjetër provë thotë prokuroria e rrëzuar pa argument nga gjykata është dhe ajo e përgjimit të telefonit të Arben Frrokut, pasi nuk është transkriptuar gabim por gjykata e cilëson padrejtësisht si të pavlefshme.

Të njëjta burime sqaruan se trupa e gjyqtarëve kryesuar nga anëtari i KLD-s Dritan Hallunaj nuk ka marrë parasysh faktin e raporteve që Enver Stafuka i cili u përfshi në vjedhjen e makinës BMW me të cilën u krye vrasja ka pasur me biznesmenin e dyshuar Arben Frroku.

Arben Stafuka prej më shumë se 1 muaj është rrëmbyer dhe zhdukur pa lënë gjurmë në Fushë Krujë, ndërsa prokuroria hetimet i ka përqendruar në pistën se Stafuka është eleminuar për të zhdukur një provë të rëndësishme siç është dhe personi për llogari të cilit Stafuka vodhi automjetin në Durrës.

Pas 48 seancave Arben Frroku i akuzuar për vrasjen e kryepolicit Dritan Lamaj shkurtin e dy viteve më parë mori pafajësinë, ndërsa apelimi i firmosur nga kryeprokurori Adriatik Llalla i cili dorëzohet të martën kërkon rikthimin e Frrokut në burg, si personi që ekzekutoi Lamajn.

Ndërsa pala mbrojtëse menjëhëre pas shpalljes së vendimit deklaroi se do të kërkojë dëmshpërblim për ditët e qëndrimit në paraburgim .

Redaksia Online
(a.h/shqiptarja.com)