Fshati i humbur në kufi me Greqinë, banorët pa rrugë: Ktheni sytë nga ne, jemi njerëz, jo kafshë

Banorët e fshatit Vidohovë në bashkinë e Devollit prej vitesh po përballen me mungesën e infrastrukturës rrugore. Të irrituar ata shprehen se në rrugën  prej 4 km Vidohovë –Miras nuk është investuar prej më shumë se 30 vitesh.

Sipas tyre shpesh fati i personave të sëmurë varet pikërisht tek kjo rrugë, pasi për shkak të terrenit të veshtirë qarkullimi i automjeteve është i vështirë dhe ata janë të detyruar që të sëmurit ti transportojnë me barrela. Ndërsa në stinën e dimrit rruga bëhet thuajse e pakaluesheme duke u kthyer në makth për ta.

"Gjendja në Vidohovë është katastrofë. Unë e kam burrin të sëmurë dhe e çova dje në Korçë, mbaroi fare. Më vështirë nuk ka më. Në dimër është kohë shumë e keqe. 1 metër e gjysmë dëborë. Ne kërkojmë që të kthejnë sytë edhe nga neve se edhe ne njerëz jemi nuk jemi kafshë.

Është shumë shumë e vështirë. Sidomos për dimër njerëzit duhet ti lëvizim me barel. Rrugë nuk ka. Rruga ka me kohë por prej 30 vitesh nuk është vënë dorë fare. Vetëm i lutemi Zotit. Këtë bëjmë. Kokën lart e mbajmë" thanë ata.

Të lënë në harresë banorët kërkojnë që pushteti lokal apo qendror të ktheje sytë tek ta dhe të zgjidhet kjo situatë që po i izolon.

/r.k./Shqiptarja.com

TAG:
• devoll
• Vidohovë
• Miras