Federata Shqiptare e Futbollit ka nisur procedimin disiplinor për trajnerin e Flamurtarit Shpëtim Duro pas deklaratave të forta dhe akuzave ndaj arbitrave se bëjnë pazare për ndeshjet. Menjëherë pas akuzave FSHF njofton se është mbledhur Shoqata e Arbitrave, e cila i kërkoi Komisioneve në FSHF që të dënojë rastin. Nuk vonon dhe Komisioni i Disiplinës në FSHF është mbledhur duke nisur procedimin për Duron.

Por, jo vetëm Duro, Disiplina ka gjobitur edhe Lushnjen me 300 mijë lekë për sjellje të gabuar të tifozëve. Si për ‘çudi’ dënimet e FSHF për trajnerin e Flamurtarit dhe ekipin e Lushnjes vijnë vetëm dy ditë pas Asamblesë ku Duka mori mandatin e pestë. Në këtë Asamble, Presidenti i Flamurtarit doli hapur pro kundërshtarit të Dukës, ndërsa Lushnja ishte ekipi që propozoi Finon dhe të dy këto ekipe marrin goditjet e para në fillim të mandatit....

Vendimet e Komisionit të Disiplinës
1. KF “Lushnja”, për sjellje të gabuar të spektatorëve në ndeshje kundër KF “Luftëtari”,në bazë të nenit 66/1 të KDS,dënohet me gjobë në masën 300.000 (treqind mijë) lekë.

2. Zyrtari i KF “Burreli ”,Akil Jakupi , për protesta ndaj vendimeve të zyrtarit të ndeshjes, në bazë të nenit 56/1.a) të KDS, dënohet me 2(dy) ndeshje pezullim nga aktiviteti.

3. Lojtari i KF “Korabi”, Emiljano Veliaj, për protesta ndaj vendimeve te zyrtarit te ndeshjes,në bazë të nenit 56/1.a) të KDS, dënohet me 2(dy) ndeshje pezullim nga aktiviteti.

4. Zyrtari i KF ”Shkumbini”,Astrit Isaj, për sjellje jo sportive ndaj vendimeve të zyrtarit të ndeshjes, në bazë të nenit 56/1.a) të KDS, dënohet me 2(dy) ndeshje pezullim nga aktiviteti

5. Pranimin e kërkesës së lojtarit të KF “Burreli”, Sadush Danaj;pezullimin pjesës së mbetur të dënimit. Në bazë të Nenit 33/4 të KDS, lojtari Sadush Danaj vendoset në provë për një periudhë 6 mujore.

6. Rrëzimin e kërkesës së zyrtarit të Flamurtari FC, Jeton Beqiri, si të pa bazuar në dispozitat e Kodit të Disiplinës Sportive.

7. Fillimin e procedimit disiplinor ndaj zyrtarit të Flamurtari FC, Shpëtim Duro lidhur me deklaratat pas ndeshjes midis Kukesit dhe Flamurtarit të datës 04.02.2018.

Kundër vendimit lejohet ankim brenda 3 (tre) ditëve përpara Komisionit të Apelit.

d.b/shqiptarja.com