FSHF reagon për stolat e thyer dhe ndaj policisë: Do publikojmë pamjet, te arrestohen ata që kryen dëmet

Federata Shqiptare e Futbollit nëpërmjet një komunikate për shtyp ka reaguar në lidhje me dëmet e shkaktuara ditën e djeshme në stadiumin ‘Air Albania’ nga tifozët e Tiranës dhe Kukësit, në ndeshjen hapëse të Superligës për këtë javë.

Sipas FSHF janë dëmtuar 164 stola, pjesa më e madhe te tifozët e Tiranës. Gjithashtu federata ka edhe një thirrje për policinë e Tiranës që të bëjë arrestimet për personat që kaën kryer dëmet, pasi do të dorëzojë pamjet filmike.

Burime të ‘Report TV’ në policinë e Tiranës mëngjesin e sotëm bënë me dije se për kësi rastesh nuk kanë patur bashkëpunimin e federatës.

Më poshtë reagimi zyrtar i FSHF-së:

Federata Shqiptare e Futbollit dënon ashpër sjelljet e papranueshme dhe vandale të disa grupeve të tifozëve në ambientet e Air Albania Stadium gjatë ndeshjes Kukësi – Tirana, sjellje këto që nuk kanë asnjë lidhje me synimin tonë për t’i kthyer ndeshjet e kampionateve tona në festa futbolli. Këto akte vandale përbëjnë shkelje ligji dhe ne kërkojmë që personat përgjegjës të përballen me ligjin.

Pas verifikimeve të kryera nga administrata e Air Albania Stadium, rezulton se janë dëmtuar 164 ulëse, nga të cilat 145 nga ana e tifozëve të Tiranës dhe 19 nga ana e tifozëve të Kukësit. FSHF ka tashmë të dokumentuara me video dhe foto personat konkretë që thyejnë ulëset dhe i flakin ato në fushë duke dëmtuar sportdashësit e tjerë si dhe duke rrezikuar edhe jetën e zyrtarëve të ndeshjes si dhe futbollistëve.

FSHF, nëpërmjet një kërkese zyrtare, i ka kërkuar policisë së Tiranës ndalimin dhe arrestimit e këtyre personave dhe tashmë ka nisur procedura nga ana e forcave të rendit. Federata e Futbollit bazuar te ligji, do të publikojë në stadium fotot dhe videot e personave që ushtrojnë dhunë në mjediset sportive.

FSHF u bën thirrje klubeve dhe grupeve të tifozerive të marrin masa dhe të respektojnë rregullin dhe ligjin në cilëndo hapsirë sportive të vendit. Komisionet në FSHF do të veprojnë në bazë të rregulloreve të brendshme duke marrë masa kundër këtyre shkelësve. Kërkojmë nga Policia e Shtetit që t’i shoqërojë personat përgjegjës në bazë të ligjit në fuqi, në mënyrë që ata të dalin para drejtësisë.

Kërkojmë mirëkuptimin e tifozerive dhe u bëjmë thirrje që sëbashku t’i kthejmë stadiumet tona në mjedise familjare, ku mbizotëron festa sportive dhe jo dhuna dhe aktet vandale.

Lajmi kryesor:

Shkatërrohen stolat në 'Air Albania', policia: FSHF nuk bashkëpunon! Tirana dhe Kukësi distancohen! Rama: Burg për katërkëmbëshat

Ne.k.//Shqiptarja.com

TAG:
• fshf
• policia
• demtimet e stolave