Futbolli shqiptar ka problematikën më të madhe në vitet e fundit. Në tre vitet e fundit janë katër çështje sportive, të gjitha nga futbolli, që janë trajtuar në Gjykatën e Arbitrazhit Sportiv në Lozanë të Zvicrës, e ashtquajtur ndryshe KAS. Po të shtosh këtu edhe apelimin e pritshëm që do të bëjë Skënderbeu pas vendimit të Komisionit të Disiplinës në UEFA, atëherë çështjet shkojnë në 5. Asnjë vend tjetër në Europë nuk ka çuar kaq shumë çështje në KAS.

Çështja e parë e trajtuar vitet e fundit, më saktë në vitin 2015, është për ndeshjen e ndërprerë në Beograd, Serbi-Shqipëri. Natyrisht, vendimi final u prit me entuziazëm nga të gjithë shqiptarët, pasi Kombëtarja e futbollit edhe falë këtij triumfi u kualifikua më pas në Europianin e vitit 2016.

Rasti i dytë në KAS ishte ai i Skënderbeut, kur klubi korçar u dënua me një vit mospjesëmarrje në Europë. Kampionët e Shqipërisë humbën në të gjitha shkallët e gjyqësorit sportiv, përfshi edhe në KAS-in e Lozanës. Skënderbeu nuk luajti për një sezon në Europë.

Rasti i tretë sërish i takon klubit të Skënderbeut. Së shpejti pritet që Gjykata e Arbitrazhit Sportiv të shprehet në lidhje me titullin e hequr të vitit 2016 nga Komisioni i Etikës në Federatën Shqiptare të Futbollit. Këtë titull e kërkon edhe Partizani, që u rendit i dyti para dy vitesh.

Rasti i katërt është më i freskëti dhe ka të bëjë me zgjedhjet në Federatën Shqiptare të Futbollit. Kandidati humbës Bashkim Fino e ka çuar çështjen në KAS, duke u bazuar në dy problematika të forta: Pjesëmarrja e shoqatave të paregjistruara në gjykatë dhe individëve pa të drejtë vote.

Dhe rasti i pestë në Gjyktaën e Arbitrazhit Sportiv që pritet brenda këtij viti është apelimi që pritet të bëjë Skënderbeu pas dënimit nga Komisioni i Disiplinës në UEFA, që ka kërkuar 10 vjet mospjesëmarrje në Europë për ekipin korçar dhe një gjobë prej 1 milion eurosh.

Përjashto çështjen e ndeshjes me Serbinë, të tjerat janë kryesisht për trukime ose manipulime, qoftë ky edhe procesi zgjedhor i vetë Federatës. Numri i madh i çështjeve në KAS nuk thotë gjë tjetër, përveçse futbolli shqiptar ka probleme të mëdha, që nga vetë Federata e më pas për të përfunduar te klubet dhe individët që kanë lidhje me futbollin.

 

d.gj/ Shqiptarja.com